آئندہ مالی سال کے بجٹ میں تنخواہ دار طبقے کو بڑا ریلیف ملے گا

وفاقی وزیر اطلاعات و نشریات چوہدری فواد حسین نے کہا ہے کہ آئندہ مالی سال کے بجٹ میں تنخواہ دار طبقے کو بڑا ریلیف ملے گا۔
ٹوئٹر پر ٹوئٹس کرتے ہوئے انہوں نے اس بات کا اعتراف کیا کہ ملک میں مہنگائی بڑھ رہی ہے لیکن ساتھ ہی ان کا یہ بھی کہنا تھا کہ اسی شرح سے قوت خرید میں بھی اضافہ ہورہا ہے جو خوش آئند بات ہے۔ وزیر اطلاعات نے امید ظاہر کی کہ آئندہ 2 برسوں میں وزیراعظم عمران خان کی قیادت میں ملک منزل کے قریب ہوگا۔ ایک اور پیغام میں ان کا کہنا تھا کہ پاکستان کے حوالے سے اچھی خبروں کا سلسلہ جاری ہے کویت نے 10 سال بعد پاکستانی شہریوں کےلیے ورک ویزا کا اجرا شروع کر دیا ہے۔ انہوں نے دعویٰ کیا کہ کورونا وائرس کے محاذ پر پر پاکستان کی بحالی کے عمل نے دنیا کو حیران کر دیا ہے جبکہ بھارت سمیت خطے کے دیگر ممالک اس موذی مرض سے نبرد آزما ہیں۔ وفاقی وزیر نے کہا کہ پاکستان میں سب سے بڑے شہر کراچی کے علاوہ پورے ملک میں کورونا کیسز مثبت آنے کی شرح 4 فیصد سے بھی کم رہ گئی ہے۔کورونا کیسز کی مثبت شرح کے حوالے سے فواد چوہدری کے دعوے پر مشیر قانون سندھ مرتضی وہاب نے ردِ عمل دیتے ہوئے کہا کہ کووِڈ 19 کو علاقائی مسئلہ نہیں بنائیں۔ترجمان حکومت سندھ کا کہنا تھا کہ نیشنل کمانڈ اینڈ آپریشن سینٹر کے مطابق پشاور میں کیسز مثبت آنے کی شرح 8.87 فیصد، مردان میں 1.34 فیصد اور مظفرآباد میں 6.9 فیصد تھی۔ساتھ ہی انہوں نے کہ میں آپ یہ بھی بتاتا چلوں کہ ملک میں وینٹی لیٹرز پر سب سے زیادہ تشویشناک مریض لاہور میں زیر علاج ہیں۔رہنما پیپلز پارٹی نے وفاقی وزیر کو یہ بھی کہا کہ مغرور مت ہوں، عاجز رہیں اور اللہ کا شکر ادا کریں۔
بجٹ میں تنخواہ دار طبقے کو بڑا ریلیف ملے گا، ہمارے ہاں مہنگائ میں اضافہ تو ہوا ہے لیکن قوت خرید میں اضافہ بھی اسی شرح سے ہو رہا ہے جو خوش آئند ہے، امید ہےاگلےدو سالوں میں عمران خان کی قیادت میں ملک منزل کے قریب ہو گا۔
— Ch Fawad Hussain (@fawadchaudhry) June 1, 2021