آٹا چور اور چینی چور عمران خان کے قریبی ساتھی ہیں

مسلم لیگ ن کے مرکزی رہنما اور پنجاب اسمبلی میں قائد حزب اختلاف حمزہ شہباز کا کہنا ہے کہ عمران خان کے اردگرد بیٹھنے والے آٹے اور چینی بحران میں ملوث ہیں، کسی حکومتی ذمہ دار کیخلاف کارروائی نہیں ہوئی، چوری بھی ہے اور سینہ زوری بھی ہے انھوں نے مزید کہا کہ نئے پاکستان کا نعرے لگانے والوں نے پرانے پاکستان کوبھی کفن پہنا دیا ہے. تبدیلی حکومت کی وجہ سے ہر گھرمیں بھوک اور افلاس کے ڈھیرے ہیں.
لاہور میں میڈیا سے بات کرتے ہوئے حمزہ شہباز نے کہا کہ ملک بھر میں عوام آج مہنگائی کی دہائی دے رہے ہیں، پی ٹی آئی کے وزرا بھی مہنگائی کے خلاف بات کر رہے ہیں اور وہ کہتے ہیں عوام کا سامنا کیسے کریں،ان کا مزید کہنا تھا کہ وزیراعظم کہتے ہیں مجھے معلوم ہے چینی بحران کے پیچھے کون ہے اور کہتے ہیں ایکشن لیں گے لیکن قوم کہتی وہ ایکشن کب ہو گا، ایکشن شہبازشریف اور نوازشریف پر ہونا ہوتا تو اب تک ہو چکا ہوتا۔
حمزہ شہباز نے کہا کہ نئے پاکستان کا نعرے لگانے والوں نے پرانے پاکستان کوبھی کفن پہنا دیا اور ابھی مہنگائی کی شروعات ہوئی ہے، ان کا مزید کہنا تھا کہ آج تک کسی حکومتی ذمہ دار کے خلاف کارروائی نہیں ہو سکی، جن کے خلاف ایکشن ہونا تھا وہ خان صاحب کے اردگرد بیٹھے ہیں انھوں نے مزید کہا کہ ملکی معیشت اس حد تک تباہ ہو چکی ہے کہ گورنر اسٹیٹ ہماری ایکسپورٹس کا سوڈان ایتھوپیا سے موازنہ کر رہے ہیں۔
لیگی رہنما نے مزید کہا کہ پہلے دن ہی میثاق معیشت کی بات کی تھی، آج سب مہنگائی کی دہائی دے رہے ہیں، پاکستان کی تاریخ میں اتنا قرض نہیں لیا گیا۔ حمزہ شہباز کا کہنا تھا وزیراعظم کہتے ہیں انہیں پتا ہے چینی مافیا کے پیچھے کون ہے ؟ اگر اس بحران میں بھی (ن) لیگ ملوث ہوتی تو ابھی تک کارروائی ہو جاتی، سچ خان صاحب کو ہضم نہیں ہوتا، مہنگائی 14.6 فیصد ہوگئی۔
پنجاب اسمبلی کے باہر مسلم لیگ ن کے اراکین اسمبلی کی طرف سے مہنگائی کے خلاف احتجاجی مظاہرہ بھی کیا گیا. مظاہرے کے دوران لیگی اراکین اسمبلی نے حکومت کے خلاف شدید نعرے بازی کی اور حکومت کو سخت تنقید کا نشانہ بنایا.