آر مادھون کا جوہی چاولہ سے شادی کا خواب پورا کیوں نہ ہوسکا؟

فلم ’’قیامت سے قیامت تک‘‘ نے اداکارہ جوہی چاولہ کو ڈیبیو مووی سے ہی سٹار بنا ڈالا تھا، یہ وہی فلم ہے جس کو دیکھ کر اداکار آر مادھون نے جوہی چاولہ سے شادی کرنے کا ارادہ کیا تھا، لیکن وہ اس مقصد میں کامیاب نہیں ہو سکے۔بھارتی میڈیا کے مطابق حال ہی میں بالی ووڈ اداکار آر مادھون نے اپنے انٹرویو میں کہا کہ میں آج سب کے سامنے اعتراف کر رہا ہوں، جب میں نے فلم ’’قیامت سے قیامت تک‘‘ دیکھی تو میں نے اپنی ماں سے کہا تھا کہ میں جوہی چاولہ سے شادی کرنا چاہتا ہوں، لیکن افسوس میرا یہ مقصد پورا نہیں ہوسکا۔اسی انٹرویو کے دوران اداکار نے اپنے بیٹے کی پیدائش کا ذکر کرتے ہوئے کہا کہ میرا بیٹا 2005 کے ممبئی سیلاب کے دوران پیدا ہوا اور بیٹے کی پیدائش سے کچھ دیر قبل ہسپتال آتے ہوئے میری بیوی سڑک پر گاڑی میں پھنس گئی تھیں، سڑک پر موجود عوام کو معلوم نہیں تھا کہ یہ میری بیوی ہیں، پھر بھی سب نے میری بیوی کی گاڑی کو پانی سے نکالنے میں مدد کی۔واضح رہے کہ منصور خان کی ہدایت کاری میں بننے والی فلم ’’قیامت سے قیامت تک‘‘ میں عامر خان کے ساتھ جوہی چاولہ نے مرکزی کردار ادا کیا تھا، اس فلم نے باکس آفس پر زبردست کمائی کی اور اس فلم کا شمار1988 کی مقبول ترین فلموں میں تھا، ’’قیامت سے قیامت تک‘‘ نے آٹھ فلم فیئر ایوارڈز جیتے، جن میں جوہی چاولہ کے لیے بہترین خاتون ڈیبیو کا ایوارڈ بھی شامل تھا۔دوسری جانب آر مادھون نے 1993 میں مشہور ٹی وی شو ’’بنے گی اپنی بات‘‘ سے شوبز میں قدم رکھا، اُنہوں نے 2001 میں مقبول رومانوی فلم ’’رہنا ہے تیرے دل میں‘‘ سے بالی ووڈ میں قدم رکھا، آر مادھون بالی ووڈ میں ڈیبیو کرنے سے پہلے کئی تامل فلموں میں بھی کام کر چکے تھے۔