بلاول بھٹو نے حریم شاہ کی شادی پر خاموشی توڑ دی

پیپلز پارٹی کے چیئرمین بلاول بھٹو زرداری نے ٹک ٹاک اسٹار حریم شاہ کی جانب سے پیپلز پارٹی کے رہنما سے شادی کرنے کے دعوے پر خاموشی توڑتے ہوئی اسے ایک ’افواہ‘ قرار دے دیا ہے جس کا مقصد اہم ملکی مسائل سے توجہ ہٹانے ہے۔
یاد رہے کہ حریم شاہ نے 28 جون کو شعوری کیا تھا کہ انہوں نے پیپلز پارٹی سندھ کے ایک صوبائی وزیر سے شادی کرلی ہے۔ لیکن حریم نے اپنے شوہر کا نام نہیں بتایا تھا، جس کے بعد اس کے نام بارے چہ مگوئیاں شروع ہوگئیں۔ ابتدائی طور پر سوشل میڈیا پر یہ افواہیں پھیلیں کہ حریم شاہ نے میرپورخاص سے منتخب ہونے والے رکن اسمبلی سید ذوالفقار علی شاہ سے شادی کرلی لیکن انہوں نے 28 جون کو ہی ایسی خبروں کو مسترد کردیا تھا۔ بعد ازاں سندھ کے ایک اور وزیر سعید غنی اور مشیر قانون مرتضیٰ وہاب نے بھی ٹک ٹاک اسٹار سے شادی کی تردید کی تھی۔ حریم شاہ کی شادی کے حوالے سے افواہیں پھیلنے کے بعد صوبائی وزیر تیمور ٹالپر نے بھی انہیں مسترد کرتے ہوئے برہمی کا اظہار کیا تھا۔ بعد ازاں کچھ ٹی وی چینلز پر یہ خبر نشر ہوئی کہ حریم دراصل سندھ کے وزیر اطلاعات ناصر حسین شاہ کی دلہن بنی ہیں لیکن انہوں نے بھی سختی سے اس خبر کی تردید کر دی تھی۔
تاہم اب پیپلز پارٹی کے چیئرمین بلاول بھٹو زرداری نے بھی اس پر خاموشی توڑتے ہوئے حریم شاہ کی شادی کی خبروں کو افواہ قرار دے دیا ہے۔بلاول نے ٹک ٹاک اسٹار کی پیپلز پارٹی کے کسی وزیر سے شادی کی خبروں کو ’سازش‘ قرار دے دیا۔ بلاول بھٹو کی اسلام آباد میں زرداری ہاؤس میں کی جانے والی پریس کانفرنس کے بعد جب حریم شاہ سے سندھ کے وزیر کی شادی کا سوال کیا گیا تو انہوں نے اسے افواہ قرار دیا۔ بلاول بھٹو نے کہا کہ ایسی تمام باتیں ملکی مسائل سے توجہ ہٹانے کی سازش ہیں اور حقیقت میں ایسا کچھ ہوا ہی نہیں ہے۔ بلاول بھٹو کا کہنا تھا کہ ایسی افواہوں کی کوئی اہمیت نہیں ہوتی اور یہ سب شوشہ بازی ہے۔
خیال رہے کہ تاحال حریم شاہ نے اپنے مبینہ شوہر کی شناخت ظاہر نہیں کی، تاہم دعویٰ کیا ہے کہ وہ 4 جولائی کو ہنی مون کے لیے شوہر کے ساتھ ترکی روانہ ہوں گی اور واپسی پر کراچی میں ولیمے کی تقریب منعقد کریں گے۔ حریم شاہ کے مطابق ان کے شوہر پہلے سے شادی شدہ ہیں اور وہ جب تک پہلی بیوی کو نہیں منا لیں گے تب تک ان کی شناخت ظاہر نہیں کی جائے گی۔