بولی وڈ پروڈیوسر بھشن کمار کے خلاف ’ریپ‘ کا مقدمہ دائر

بھارت کی معروف میوزک ریکارڈ کمپنی ’ٹی سیریز‘ کے منیجنگ ڈائریکٹر (ایم ڈی) اور بولی وڈ پروڈیوسر بھشن کمار کے خلاف 30 سالہ خاتون کا ’ریپ‘ کرنے کا مقدمہ دائر کردیا گیا۔

بھارتی نشریاتی ادارے ’نیوز 18‘ کے مطابق بھشن کمار کے خلاف ریاست مہاراشٹر کے شہر ممبئی کے ڈی این نگر پولیس تھانے میں خاتون کی شکایت پر مقدمہ دائر کیا گیا۔

بھشن کمار کے خلاف تعزیرات ہند کی دفعہ 376 کے تحت مقدمہ دائر کرکے تفتیش شروع کردی گئی، تاہم تاحال کوئی گرفتاری عمل میں نہیں لائی گئی۔

اسی حوالے سے بھارتی خبر رساں ادارے ایشین نیوز انٹرنیشنل (اے این آئی) نے بتایا کہ بھشن کمار کے خلاف نامعلوم خاتون کی فریاد پر ’ریپ‘ کا مقدمہ دائر کیا گیا۔

میوزک و فلم پروڈیوسر کے خلاف الزام لگانے والی 30 سالہ خاتون نے دعویٰ کیا کہ بھشن کمار نے انہیں فلم میں کام دینے کے عوض ’ریپ‘ کا نشانہ بنایا۔

فوری طور پر یہ واضح نہیں ہوسکا کہ مذکورہ واقعہ کب پیش آیا اور تاحال بھشن کمار نے بھی واقعے پر کوئی رد عمل نہیں دیا۔

بھشن کمار کے خلاف مذکورہ مقدمہ دائر ہونے سے قبل 2018 میں بھی ’می ٹو مہم‘ شروع ہونے کے بعد خواتین نے ’ریپ‘ اور ’جنسی ہراسانی‘ کے الزامات لگائے تھے۔

ابتدائی طور پر اکتوبر 2018 میں بھشن کمار کے خلاف ایک خاتون نے ممبئی پولیس میں جنسی ہراسانی کی شکایت درج کروائی تھی۔

بھشن کمار کی اہلیہ ہمیشہ ان کے ساتھ کھڑی دکھائی دیتی ہیں—فائل فوٹو: فیس بک
ان کے خلاف الزام لگانے والی خاتون نے دعویٰ کیا تھا کہ بھشن کمار نے ان سے تین گانوں میں کام کے بدلے جنسی تعلقات کا مطالبہ کیا تھا مگر خاتون کے الزامات آنے کے بعد پروڈیوسر اور ان کی اہلیہ نے انہیں جھوٹا قرار دیا تھا۔

اسی طرح جنوری 2019 میں بھی ایک خاتون نے دعویٰ کیا تھا کہ بھشن کمار نے ان سے تین فلموں میں کام کے بدلے جنسی تعلقات کا مطالبہ کیا تھا۔

بھشن کمار پر دیگر خواتین نے بھی جنسی ہراسانی کے الزامات لگائے تھے مگر اس وقت پروڈیوسر نے تمام الزامات کو مسترد کردیا تھا اور ان کے خلاف کسی قسم کی کوئی قانونی کارروائی بھی نہیں کی جا سکی تھی۔ تاہم اب باضابطہ طور پر بھشن کمار کے خلاف مقدمہ دائر کرکے تفتیش کا آغاز کردیا گیا اور خیال کیا جا رہا ہے کہ چند روز میں پولیس پروڈیوسر کو سمن جاری کرے گی یا وہ خود تھانے پہنچ کر بیان ریکارڈ کروائیں گے۔

بھشن کمار بھارت کی سب سے بڑی میوزک کمپنی ’ٹی سیریز‘ کے سربراہ ہے، مذکورہ کمپنی کو ان کے والد گلشن کمار نے 1980 میں بنایا تھا۔

یہ کمپنی شروع سے ہی زیادہ تر فلموں کی موسیقی کی تیاری کا کام کرتی آئی ہے، تاہم گزشتہ 2 دہائیوں سے یہ فلم پروڈکشن میں بھی اچھا کام کر رہی ہے۔

گلشن کمار 1997 میں 41 برس کی عمر میں چل بسے تھے، جس کے بعد ٹی سیریز کو ان کے بھائی نے سنبھالا، بعد ازاں کمپنی کو ان کے بیٹے بھشن کمار نے سنبھالا اور کمپنی نے گانوں کے بعد فلموں کو بنانا بھی شروع کیا۔