سی ٹی ڈی کی کارروائی میں 5 مشتبہ عسکریت پسند ہلاک

انسداد دہشت گردی کے محکمہ (سی ٹی ڈی) نے ہزار گنجی کے علاقے میں آپریشن کے دوران کالعدم تنظیم کے 5 مشتبہ دہشت گردوں کو ہلاک کرنے کا دعویٰ کیا ہے۔

سی ٹی ڈی کے ترجمان نے بتایا کہ محکمہ نے یہ کارروائی کوئٹہ کے نواح میں ہزارہ گنجی کے علاقے کِلی گلزار میں کی تھی اور دیگر قانون نافذ کرنے والے اداروں کے ساتھ مل کر دہشت گردوں کی موجودگی کی اطلاع پر یہ کارروائی کی تھی۔

سیکیورٹی اہلکاروں نے علاقے کو گھیرے میں لے کر مسلح عسکریت پسندوں کو ہتھیار ڈالنے کو کہا لیکن انہوں نے اندھا دھند فائرنگ شروع کردی۔

سیکیورٹی اہلکاروں نے جوابی فائرنگ کی جس کے نتیجے میں 5 عسکریت پسند ہلاک ہوگئے جبکہ دو گھنٹے تک فائرنگ کا تبادلہ جاری رہا تھا۔

سی ٹی ڈی کے ترجمان نے بتایا لڑائی میں کالعدم بلوچ لبریشن آرمی (بی ایل اے) سے تعلق رکھنے والے 5 دہشت گرد مارے گئے ہیں۔

رواں برس مارچ میں بھی سی ٹی ڈی نے ضلع مستونگ میں ایک آپریشن کے دوران کالعدم تنظیم سے تعلق رکھنے والے 5 مشتبہ دہشت گردوں کو ہلاک کردیا تھا۔

سی ٹی ڈی اہلکاروں نے ضلع مستونگ کے علاقے اسپلنجی میں اتوار اور پیر کی درمیانی رات عسکریت پسندوں کے ایک ٹھکانے پر چھاپہ مارا تھا۔

Back to top button