شکستہ دل شعیب ملک کے دوسروں کو محبت بڑھانے کے مشورے

قومی کرکٹ ٹیم کے سابق کپتان شعیب ملک نے خوشگوار زندگی کیلئے خود اعتمادی کو ضروری قرار دیتے ہوئے کہا ہے کہ ہمیں ہر طرح کے تعلقات کیلئے ہمیشہ ہر چیز کیلئے ہاں بھی نہیں کرنی چاہئے، بلکہ اپنی انفرادی حیثیت کو بھی برقرار رکھنا چاہئے۔شعیب ملک ایک نئے پوڈ کاسٹ میں مہمان تھے جہاں انہوں نے زندگی میں اپنے تجربات کے بارے میں عوام کیساتھ بہت کچھ شیئر کیا، وہ ایک بیٹے کے باپ ہیں اور ان کا اپنی ماں اور بہن کیساتھ بہت گہرا رشتہ ہے۔شعیب ملک نے پوڈ کاسٹ میں خاص کر مردوں کو بے شمار مشوروں سے نوازا اور کہا کہ خصوصاً مردوں کو اپنے تعلقات بہتر رکھنے چاہئیں، انہوں نے خواتین کو مخاطب کرتے ہوئے کہا کہ انہیں صرف گھروں کی دیکھ بھال تک محدود نہیں رہنا چاہئے بلکہ انفرادیت حیثیت کو بھی برقرار رکھنا چاہئے، خوشگوار تعلقات کیلئے دو طرفہ روابط اور گفت و شنید کلیدی حیثیت رکھتی ہے اور وہ یہ سمجھتے ہیں کہ انہی چیزوں کو اولین ترجیح بھی دینی چاہئے۔مایہ ناز کرکٹر شعیب ملک کا اپنے بارے میں یہ بھی کہنا تھا کہ وہ دل ٹوٹ جانے سے کیسے نمٹتے ہیں، اب وہ اپنے دل کی ایسی تربیت کر چکے ہیں کہ اب وہ لوگوں سے بہت زیادہ توقعات نہیں رکھتے، اگر آپ دوسرے سے توقعات کم کر دیتے ہیں تو اس سے آپ میں پیدا ہونے والی خود اعتمادی آپ کی طویل المدت مدد کرتی ہے اگرچہ میں ایک حساس شخص ہوں اور مجھے بھی بہت تکلیف ہوتی ہے لیکن میں نے اپنی تربیت ایسی کر لی ہے کہ یہ اب مجھے زندگی میں مدد فراہم کرتی ہے۔واضح رہے کہ شعیب ملک کا شمار پاکستان کے مشہور ترین کرکٹرز میں ہوتا ہے وہ قومی ٹیم کے کپتان بھی رہے ہیں اور انہوں نے پاکستان کو کرکٹ کے میدان میں کئی فتوحات بھی دلائی ہیں، شعیب ملک کا شمار ان کھلاڑیوں میں سے ایک میں ہوتا ہے جن کی ذاتی زندگی بھی براہ راست ذرائع ابلاغ اور عوام میں زیر بحث رہی ہے، شعیب ملک نے بھارت کی مشہور ایتھلیٹ ثانیہ مرزا سے محبت کی شادی کی اور ان کی شادی کے چرچے گردش میں رہے ہیں، حال ہی میں ان کی علیحدگی کی خبریں گردش کر رہی ہیں جس کے باعث شعیب ملک پھر عوامی بحث کا حصہ بن گئے ہیں۔