شین واٹسن نے اردو میں پاکستانیوں کو کیا پیغام دیا؟
پاکستان سپر لیگ کے شیڈول کے اعلان کے ساتھ ہی شائقین کرکٹ کے جوش و خروش میں اضافہ ہو گیا اور وہ پوری شدت کے ساتھ لیگ کے آغاز کے منتظر ہیں۔شائقین کرکٹ کے ساتھ ساتھ مقامی اور انٹرنیشنل کرکٹرز بھی پاکستان سپر لیگ کے پانچویں ایڈیشن کے حوالے سے انتہائی پرجوش ہیں اور انہیں میں سے ایک سابق آسٹریلین آل راؤنڈر شین واٹسن بھی ہیں۔
سابق مایہ ناز آسٹریلین آل راؤنڈر بھی پاکستان سپر لیگ 2020 میں شرکت کے لیے پرعزم ہیں اور انہوں نے شائقین کرکٹ کے نام اردو میں خصوصی پیغام دیا۔کوئٹہ گلیڈی ایٹرز کی نمائندگی کرنے والے عالمی شہرت یافتہ سپر اسٹار نے پاکستان کی قومی زبان میں دیے گئے پیغام میں کہا کہ پاکستانیوں، شین واٹسن آ رہا ہے پاکستان۔انہوں نے شائقین کرکٹ سے کوئٹہ گلیڈی ایٹرز کو سپورٹ کرنے کی درخواست کرتے ہوئے کہا کہ آپ سب پرپل فورس کو سپورٹ کریں، اس بار ہو گا کوئٹہ، کوئٹہ۔
📢📢📢 Pakistanio ‼️@ShaneRWatson33 Aarha Hai Pakistan 🇵🇰
Aap Sab #PurpleForce Ko Support Karein.
Is Bar Hoga Quetta! Quettaa!! 💜💜@thePSLt20 #WeTheGladiators #HBLPSLV pic.twitter.com/Qq1YVL3S3s
— Quetta Gladiators (@TeamQuetta) January 3, 2020
یاد رہے کہ پاکستان کرکٹ بورڈ نے نئے سال کے پہلے دن پاکستان سپر لیگ 2020 کے شیڈول کا اعلان کردیا تھا اور ایونٹ کا پہلا میچ دفاعی چیمپیئن کوئٹہ گلیڈی ایٹرز اور اسلام آباد یونائیٹڈ کے درمیان 20فروری کو کھیلا جائے گا۔پاکستان سپر لیگ کے اس ایونٹ کی خاص بات یہ ہے کہ اس مرتبہ ایونٹ کے تمام 34میچز پاکستان میں ہی کھیلے جائیں گے اور کراچی، لاہور، راولپنڈی اور ملتان ان میچز کی میزبانی کریں گے۔واضح رہے کہ دنیا بھر کے سپر اسٹارز پاکستان سپر لیگ میں شرکت اور پاکستان آنے کے حوالے سے پہلے ہی رضامندی ظاہر کر چکے ہیں۔
