عمران خان انٹراپارٹی الیکشن سے دستبردار، بیرسٹر گوہر کی نامزدگی متوقع
پی ٹی آئی کے چیئرمین عمران خان انٹرا پارٹی الیکشن کے دوران چیئرمین کے عہدے سے دستبردار ہوگئے، جبکہ بیرسٹر گوہر خان کو چیئرمین نامزد کیے جانے کا امکان ہے۔ذرائع کا کہنا ہے کہ توشہ خانہ کیس میں سزا کے باعث انٹراپارٹی الیکشن میں بطور چیئرمین نیا امیدوار ہوگا اور انٹراپارٹی انتخابات میں دوسرا رکن بطور چیئرمین منتخب کیا جائے گا۔ ذرائع نے بتایاکہ تحریک انصاف پارٹی چیئرمین اور نائب چیئرمین اور تنظیمی عہدوں پر انتخابات ہوں گے، چیئرمین پی ٹی آئی پارٹی کے تنظیمی اموراورفیصلوں کی توثیق خودکریں گے۔
پارٹی ذرائع کا کہنا ہے کہ سزا ختم ہونے پر دوبارہ عمران خان بحیثیت چیئرمین انٹراپارٹی انتخابات میں حصہ لیں گے جبکہ ابھی نئے چیئرمین کے لیے نام کا فیصلہ خود عمران خان کریں گے، اس کے علاوہ پارٹی میں نئی شمولیت اور ٹکٹوں کے سب فیصلے چیئرمین پی ٹی آئی کریں گے۔عمران خان کے وکیل و پارٹی کے سینیئر نائب صدر شیرافضل مروت نے چیئرمین پی ٹی آئی کے انٹراپارٹی انتخابات میں حصہ نہ لینے کی تصدیق کردی اور جیو نیوز سے گفتگو میں کہا کہ چیئرمین پی ٹی آئی انٹرا پارٹی انتخابات میں حصہ نہیں لیں گے، خیال رہے کہ الیکشن کمیشن کے فیصلے کے تحت تحریک انصاف کے انٹرا پارٹی الیکشن جمعے کو ہوں گے۔
پاکستان تحریک انصاف کے چیئرمین عمران خان پارٹی چیئرمین شپ سے دستبردار ہوگئے ہیں اور وہ انٹرا پارٹی انتخابات میں چیئرمین کے امیدوار نہیں ہوں گے۔ ذرائع کے مطابق عمران خان نے جیل سے پارٹی کی کور کمیٹی کو پیغام پہنچا دیا۔ توشہ خانہ کیس میں سزا کے باعث انٹراپارٹی الیکشن میں بطور چیئرمین نیا امیدوار ہوگا اور انٹراپارٹی انتخابات میں دوسرا رکن بطور چیئرمین منتخب کیا جائے گا، پی ٹی آئی پارٹی الیکشن میں بیرسٹرگوہرخان کو چیئرمین نامزد کیے جانے کا امکان ہے تاہم جیو نیوز کے رابطہ کرنے پر بیرسٹر گوہر نے تصدیق یا تردید نہیں کی ہے، اس حوالے سے بیرسٹرگوہر کا کہنا تھاکہ نیا پارٹی چیئرمین منتخب کرنے کا فیصلہ جمعہ کو ہوگا۔ابھی تک پی ٹی آئی کے چیئرمین سے متعلق فیصلہ نہیں ہوا۔
دوسری جانب ترجمان پی ٹی آئی شعیب شاہین نے کہا کہ ابھی تک کسی نام کا بحیثیت چیئرمین پارٹی فیصلہ نہیں ہوا، عمران خان سے ملاقات کے بعد نئے پی ٹی آئی چیئرمین کے نام کا فیصلہ ہوگا۔خیال رہے کہ چیئرمین پی ٹی آئی قانونی قدغن کی وجہ سے انٹراپارٹی الیکشن حصہ نہیں لے رہے۔
