عمران خان کا چیف جسٹس کو ایک اور خط، انصاف کے دروازے بند ہونے کا شکوہ

پاکستان تحریک انصاف کے بانی عمران خان نے چیف جسٹس آف پاکستان جسٹس یحییٰ آفریدی کو ایک اور خط ارسال کردیا۔

ذرائع کے مطابق یہ خط عمران خان کی ہمشیرہ علیمہ خان نے سپریم کورٹ کی آر اینڈ آئی برانچ میں جمع کرایا۔ خط میں عمران خان نے مؤقف اختیار کیا کہ انصاف کے دروازے ان اور ان کی اہلیہ پر بند کر دیے گئے ہیں۔

عمران خان نے خط میں لکھا کہ وہ گزشتہ 772 دنوں سے تنہائی کی قید کاٹ رہے ہیں، 9×11 کے کمرے کو ان کے لیے پنجرہ بنا دیا گیا ہے اور ان کے خلاف 300 سے زائد سیاسی مقدمات قائم کیے گئے ہیں، جو ملک کی تاریخ میں ایک مثال نہیں رکھتے۔

خط میں مزید کہا گیا کہ ان کی اہلیہ بشریٰ بی بی کی صحت مسلسل بگڑ رہی ہے لیکن ڈاکٹر کو معائنے کی اجازت نہیں دی جاتی۔

دوسری جانب اسلام آباد ہائیکورٹ میں علیمہ خان نے گفتگو کرتے ہوئے کہا کہ انہوں نے چیف جسٹس سے عمران خان اور بشریٰ بی بی کی سزا معطلی کیس جلد لگانے کی درخواست کی ہے۔ چیف جسٹس سرفراز ڈوگر نے اس کیس کو 25 ستمبر کو مقرر کرنے کی یقین دہانی کرائی ہے۔