نواز شریف نے ملک کیلئے سیاسی استحکام ضروری قرار دیدیا

سابق وزیراعظم نواز شریف نے ملک کے لیے سیاسی استحکام کو ضروری قرار دیتے ہوئے کہا ہے کہ جب آپ حکومت کے پاؤں اکھاڑ دیں تو وہ حکومت نہیں رہتی، مریم نواز سرکاری عہدہ نہ ہونے کے باوجود جیل گئیں۔

سیالکوٹ چیمبر میں تاجروں سے خطاب میں قائد مسلم لیگ ن نے کہا کہ ہماری 4 سالہ حکومت کے آخری سال حکومت نہ ہونے کے برابر تھی۔وہ ہم سے الیکشن جیتنے کی سکت نہیں رکھتا تھا، لیکن ہمیں گرایا گیا اور اُسے لایا گیا اور اس نے آکر جو ملک کاحشر کیا آپ نے دیکھ لیا ہے۔

ان کا کہنا تھا کہ خواجہ آصف اپنے والد خواجہ صفدر کے نقش قدم پر چل رہے ہیں، آج تک سمجھ نہیں آیا کہ خواجہ صاحب جیل کیوں گئے تھے؟ میں پہلی بار طیارہ سازش کیس میں جیل گیا تھا، صبح وزیراعظم تھا شام کو ہائی جیکر بن گیا۔

انہوں نے کہا کہ 2014 میں دھرنے میں کہا گیا نواز شریف کے گلے میں رسا ڈال کر پی ایم ہاؤس سے نکالیں گے، ہنستے بستے پاکستان کو بغض اور حسد نکالنے والوں کے حوالے کیا گیا۔آج 50 ہزار ماہانہ کمانے والے کا بھی گزارا نہیں ہوسکتا، اگر 4 بچے ہوں اور کرائے کا مکان ہو تو ایک لاکھ کمانے والا بھی گزارا نہیں کر سکتا۔

اُن کا کہنا تھا کہ ہماری خارجہ پالیسی بھی کامیاب تھی، دو بار بھارتی وزیراعظم پاکستان آئے، کیا کسی اور کے دور میں بھارتی وزیراعظم پاکستان نہیں آیا۔پاکستان کے وزیراعظم کو کبھی جیل دیکھنی پڑتی ہے کبھی جلاوطن ہونا پڑتا ہے، جب کسی کی مدت پوری ہونے نہیں دیں گے تو ملک کیسے آگے بڑھے گا۔