وکلاکااحتجاج شہریوں کیلئے مشکلات پیداکررہاہے،جسٹس جمال مندوخیل

سپریم کورٹ کے آئیینی بینچ میں جسٹس جمال مندوخیل نے ریمارکس دیئے کہ وکلا کااحتجاج شہریوں کیلئے مشکلات پیداکررہاہے۔

اسلام آباد میں وکلا کے احتجاج کے پیش نظر راستوں کی بندش کی وجہ سے سپریم کورٹ کے آئینی بینچ نے ملٹری کورٹس کیس کی سماعت کل تک ملتوی کردی۔

عدالت عظمیٰ میں جسٹس امین الدین خان کی سربراہی میں 7 رکنی آئینی بینچ نے سماعت شروع کی،تو معاون وکیل نے آگاہ کیا کہ سپریم کورٹ آنے کیلئےصرف مارگلہ روڈ والا ایک ہی راستہ کھلا ہوا ہے۔

جسٹس جمال خان مندوخیل نے ریمارکس دیئے لگتا ہےوکلا چاہتے ہیں لوگ قید میں سڑتے رہیں۔

معاون وکیل رانا وقار نے کہا کہ سلمان اکرم راجا ٹریفک میں پھنسنے کے سبب نہیں پہنچ سکے۔

جسٹس جمال مندوخیل نے کہا کہ خواجہ حارث صاحب پہنچ گئے،آدھا گھنٹہ پہلے نکل آتے تواس وقت سپریم کورٹ میں ہوتے،لگتا ہے وکلا چاہتے ہیں لوگ قید میں سڑتے رہیں۔

یاد رہے کہ اسلام آباد میں وکلا کے احتجاج کے پیش نظر ریڈ زون کے گرد سیکیورٹی سخت کردی گئی تھی،اور ریڈ زون میں داخلے کے راستے محدود کر دیئے گئے تھے۔

ریڈ زون میں داخلے  کیلئےصرف مارگلہ روڈ کھلا ہوا ہے،دیگرراستوں پررکاوٹیں کھڑی کی گئی ہیں۔

آج اسلام آباد میں سرکاری ملازمین کی جانب سے بھی پارلیمنٹ ہاؤس کے باہر دھرنے کا اعلان کیا گیا تھا، تاہم احتجاج سے قبل ہی حکومت اور سرکاری ملازمین کی قیادت کے درمیان مذاکرات کامیاب ہوگئے تھے۔