چیف جسٹس آف پاکستان کی تقرری کےلیے پارلیمانی کمیٹی کا اجلاس آج طلب
26 ویں آئینی ترمیم کی منظوری کے بعد نئے چیف جسٹس پاکستان کی تعیناتی کےلیے پارلیمانی کمیٹی کی تشکیل کا نوٹی فکیشن جاری کردیا گیا ہے، کمیٹی کا اجلاس آج (منگل) شام 4 بجے طلب کیاگیا ہے۔
خصوصی پارلیمانی کمیٹی کےلیے تمام 12 ممبران کے نام اسپیکر آفس کو موصول ہونے کےبعد کمیٹی کی تشکیل کا نوٹی فکیشن جاری کیا گیا۔
خصوصی پارلیمانی کمیٹی کےلیے سینیٹ سے چار نامزد ارکان مسلم لیگ ن کے اعظم نذیر تارڑ،پیپلز پارٹی کے فاروق ایچ نائیک،پی ٹی آئی کے بیرسٹر علی ظفر اور جمعیت علمائے اسلام (ف) کے کامران مرتضیٰ شامل ہیں۔
اسی طرح خصوصی پارلیمانی کمیٹی کےلیے قومی اسمبلی کے 8 اراکین میں مسلم لیگ ن کے خواجہ آصف،احسن اقبال اور شائستہ پرویز شامل ہیں۔
پیپلز پارٹی کےراجہ پرویز اشرف اور نوید قمر جب کہ پی ٹی آئی کی جانب سے بیرسٹر گوہر اور صاحبزادہ حامد رضا جب کہ ایم کیو ایم پاکستان کی رعنا انصار بھی خصوصی پارلیمانی پارٹی کا حصہ ہیں۔
چیف جسٹس کی تعیناتی کےلیے قائم خصوصی پارلیمانی کمیٹی کا اجلاس طلب کر لیاگیا ہے، کمیٹی کا اجلاس آج شام 4 بجے پارلیمنٹ ہاؤس میں ہوگاجہاں نئے چیف جسٹس کی تقرری کی منظوری دی جائےگی۔
واضح رہےکہ وزارت قانون سےتین سینئر ججز کا پینل طلب کیا جائےگا، 12 رکنی کمیٹی ججز کے پینل میں سے چیف جسٹس آف پاکستان کا انتخاب عمل میں لائے گی،موجودہ چیف جسٹس کی ریٹائرمنٹ سے 3 روز قبل 3 سینئر ججز کا پینل اسپیکر قومی اسمبلی کو ارسال کریں گے اور اسپیکر قومی اسمبلی چیف جسٹس کی تقرری کےلیےججز کا پینل کمیٹی کو ارسال کریں گے۔
26ویں آئینی ترمیم کے تحت پی ٹی آئی نے سپریم کورٹ سے پہلا ریلیف مانگ لیا
پی ٹی آئی کا پارلیمانی کمیٹی کے اجلاس سے الگ رہنے کا اعلان
دوسری جانب پی ٹی آئی نے پارلیمانی کمیٹی کے اجلاس سے الگ رہنے کا اعلان کیا ہے۔
پی ٹی آئی کی سیاسی کمیٹی کے اجلاس کے جاری کردہ اعلامیہ کےمطابق 26 ویں آئینی ترمیم پر پارٹی پالیسی کےخلاف ووٹ دینےوالے اراکین کے خلاف سخت کارروائی عمل میں لانے کی منظوری دے دی گئی۔
اجلاس میں ووٹ دینےوالے اراکین پارلیمان کی بنیادی جماعتی رکنیت کی منسوخی سمیت ان کے خلاف حتمی تادیبی کارروائی پر اتفاق کیاگیا،شوکاز نوٹس کے جوابات کی روشنی میں ان کے آئندہ کے مستقبل کا تعین کیاجائے گا۔
