ڈیرن سیمی کو پاکستان کی اعزازی شہریت دینے کا اعلان
حکومت پاکستان نے ویسٹ انڈین کرکٹر اور پاکستان سپر لیگ میں حصہ لینے والی پشاور زلمی کے کپتان ڈیرن سیمی کو پاکستان کا اعلی ترین شہری ایوارڈ دینے کا اعلان کیا ہے۔ ساتھ ہی انہیں پاکستان کی اعزازی شہریت دینے کا بھی اعلان کیا گیا۔
اس بات کا اعلان پاکستان کرکٹ بورڈ نے ایک ٹویٹ کے ذریعے کیا جس میں مزید کہا گیا ہے کہ صدر پاکستان ڈاکٹر عارف علوی 23 مارچ کو اسلام آباد میں ہونے والی تقریب میں ڈیرن سیمی کو یہ ایوارڈ دیں گے۔ ڈیرن سیمی کو پاکستان سپر لیگ خصوصاً پاکستان میں انٹرنیشنل کرکٹ کی واپسی کے لیے خدمات پر یہ اعزاز دیا جائے گا۔
پشاور زلمی کے کپتان ڈیرن سیمی پاکستان سپر لیگ میں شرکت کرنے والے غیرملکی کھلاڑیوں کے مقابلے میں پاکستان میں سب سے زیادہ مقبول ہیں۔
President of Pakistan Dr @ArifAlvi will confer the highest civilian award and honourary citizenship to Darren Sammy on 23 March for his invaluable contribution to cricket in Pakistan. pic.twitter.com/mn9AiLknB0
— PCB Media (@TheRealPCBMedia) February 22, 2020
جب 2017 میں پاکستان سپر لیگ کی پہلی مرتبہ پاکستان آمد ہوئی تھی تو لاہور میں کھیلے گئے فائنل میچ کےلیے پشاور زلمی کے کپتان ڈیرن سیمی نے سب سے پہلے میچ کےلیے ٹیم پاکستان لانے کا اعلان کیا تھا۔ ان کے اس اقدام کو بہت سراہا گیا تھا اور اس کے بعد سے وہ پاکستان میں سب سے زیادہ مقبول ہیں۔
گزشتہ دنوں پاکستان سپر لیگ کے پانچویں ایڈیشن کی افتتاحی تقریب کے موقع پر چیئرمین پی سی بی احسان مانی نے کہا تھا کہ سیمی کو پاکستان کی اعزازی شہریت دینے کی سمری صدر مملکت عارف علوی کے پاس ہے۔
آج پاکستان کرکٹ بورڈ نے اعلان کیا ہے کہ رواں سال 23مارچ کو یوم پاکستان کے موقع پر منعقد ہونے والی تقریب پر سابق ویسٹ انڈین کپتان ڈیرن سیمی کو پاکستان کی اعزازی شہریت دی جائے گی۔
پاکستان کرکٹ بورڈ نے مزید کہا کہ عارف علوی پشاور زلمی کے کپتان ڈیرن سیمی کو پاکستان کے سب سے بڑے شہری اعزاز اور پاکستان کی شہریت سے نوازیں گے۔
ڈیرن سمی @darensammy88 کو پاکستان کا اعلیء ترین سول ایوارڈ دینے کا فیصلہ صدر مملکت کا حقیقت میں کرکٹ اور پاکستان سے محبت کرنے والوں کے جذبات و احساسات کی عکاس ہے۔بلاشبہ اس مرد میدان کی خدمات پاکستان میں کرکٹ کی واپسی کے لئے ناقابل فراموش ہیں https://t.co/88PDthmAtD
— Javed Afridi (@JAfridi10) February 22, 2020
پشاور زلمی کے مالک جاوید آفریدی نے ڈیرن سیمی کو پاکستان کی اعزازی شہریت اور اعلیٰ ترین سول ایوارڈ دینے کے فیصلے کو زلمی کےلیے اعزاز قرار دیا۔
انہوں نے کہا کہ ڈیرن سیمی کو پاکستان کا اعلیٰ ترین سول ایوارڈ دینے کا فیصلہ صدر مملکت کا حقیقت میں کرکٹ اور پاکستان سے محبت کرنے والوں کے جذبات و احساسات کی عکاس ہے، بلاشبہ اس مرد میدان کی خدمات پاکستان میں کرکٹ کی واپسی کےلیے ناقابل فراموش ہیں۔
انہوں نے مزید کہا کہ پاکستان کرکٹ کی تاریخ میں یہ اعزاز پشاور زلمی کے حصے میں آیا کہ اس کے کپتان ڈیرن سیمی کو حکومت پاکستان کی جانب سے اعلیٰ ترین سول ایوارڈ سے نوازا گیا، ہم اللہ تعالیٰ کی بارگاہ میں سجدہ شکر کے ساتھ ساتھ اپنے چاہنے والوں اور حکومت پاکستان کے اس عزت کے لیے شکر گزار ہیں.
یاد رہے کہ ڈیرن سیمی کی زیر قیادت ویسٹ انڈیز کی ٹیم دو مرتبہ ورلڈ ٹی20 کی چیمپیئن بھی بن چکی ہے۔
