گوگل کا پاکستان میں کروم بُک کی مقامی تیاری اور اے آئی لیب کے قیام کا اعلان
وزارتِ انفارمیشن ٹیکنالوجی اینڈ ٹیلی کمیونیکیشن (ایم او آئی ٹی ٹی) اور گوگل نے پاکستان میں ڈیجیٹل ترقی کے اگلے مرحلے کو آگے بڑھانے کے لیے مفاہمتی یادداشت (ایم او یو) پر دستخط کیے ہیں۔
یہ تقریب وزیراعظم کے دفتر میں منعقد ہوئی، جس میں نائب وزیراعظم اسحٰق ڈار، وفاقی وزیر برائے آئی ٹی شزا فاطمہ، اعلیٰ سرکاری حکام اور گوگل کی علاقائی قیادت نے شرکت کی۔
گوگل پاکستان کے کنٹری ڈائریکٹر فرحان قریشی نے کہا کہ پاکستان میں تیار کردہ کروم بُکس کی مقامی تیاری تعلیم کے شعبے میں ڈیجیٹل تبدیلی کا اہم سنگِ میل ہے۔ انہوں نے کہا کہ ان ڈیوائسز سے تعلیمی ٹیکنالوجی اور ڈیجیٹل مہارتوں کی تربیت کو فروغ ملے گا، جو 2030 تک پاکستان کے جی ڈی پی میں 28 کھرب روپے کے اضافے کا باعث بن سکتی ہے۔
ایم او یو کے مطابق، گوگل اور وزارت آئی ٹی تین اہم شعبوں میں تعاون کریں گے — ڈیجیٹل اسکلز، مصنوعی ذہانت (AI)، اور گیمنگ انڈسٹری۔
2025 تک ایک لاکھ گوگل کیریئر سرٹیفکیٹس دیے جائیں گے، جن میں سے نصف خواتین کے لیے مختص ہوں گے۔
ایک اے آئی اسکلز لیب قائم کی جائے گی جو ایک لاکھ سے زائد ڈیولپرز کو جدید ٹیکنالوجی سے جوڑے گی۔
گیمنگ انڈسٹری کے لیے پالیسی فریم ورک اور اسٹارٹ اپس کے لیے گوگل کلاؤڈ سپورٹ فراہم کی جائے گی۔
اس کے علاوہ، AI لیڈرز فیلوشپ پروگرام کے تحت پاکستان کے سرکاری و نجی اداروں کے 100 رہنماؤں کو مصنوعی ذہانت کے ذمہ دارانہ استعمال کی تربیت دی جائے گی۔
وفاقی وزیر آئی ٹی شزا فاطمہ نے کہا کہ “پاکستان میں کروم بُک اسمبلی لائن کا آغاز ٹیکنالوجی، مینوفیکچرنگ اور تعلیم کے ملاپ کا انقلاب ہے۔”
