ہم پی ٹی آئی سے اخلاص کے ساتھ مذاکرات کررہے ہیں : احسن اقبال

وفاقی وزیر برائے منصوبہ بندی احسن اقبال کا کہنا ہے کہ جس حکومت کا معاشی ایجنڈا ہوتا ہے وہ سیاسی استحکام میں دلچسپی رکھتی ہے،اس لیے ہم پی ٹی آئی کے ساتھ اخلاص کے ساتھ بات چیت کررہے ہیں۔

مسلم لیگ ن کے سینیئر رہنما احسن اقبال کا کہنا ہے کہ میں نے بھی جعلی مقدمات کا سامنا کیا لیکن باہر جاکر کانگریس یا اقوام متحدہ میں کسی کے پاؤں نہیں پکڑے۔ہم نےاپنے مقدمے پاکستان کی عدالتوں میں لڑکر باعزت رہائی حاصل کی۔

پی ٹی آئی کے زیر حراست کارکنوں کے بارےمیں احسن اقبال نے کہاکہ اس وقت پاکستان میں کوئی قیدی کسی ایگزیکٹیو آرڈر کے تحت قید نہیں ہےکہ ہم ڈپٹی کمشنر کو کہیں کہ اسے چھوڑ دیں۔یہ سب مقدمات میں قید ہیں اور جوڈیشل ریمانڈ پر ہیں۔انہوں نے کہاکہ ان قیدیوں کی رہائی کا واحد حل یہ ہےکہ وہ عدالت میں جائیں۔

پی ٹی آئی سے مذاکرات کے بارےمیں احسن اقبال کا کہنا تھاکہ ہم آئین و قانون کے دائرے میں ہونےوالے مطالبات کو پورا کریں گے۔انہوں نے امید ظاہر کی کہ پی ٹی آئی کھلے دل کے ساتھ مذاکرات کرےگی۔

احسن اقبال نے پی ٹی آئی کی معاشی پالیسیوں کو تنقید کا نشانہ بناتےہوئے کہاکہ 4 سال ہمیں کچھ معلوم نہیں چلا کہ ہماری سمت کیا ہے۔

پی ٹی آئی میں راستے بند کرنے کے بجائے کھولنے کی سوچ پیدا ہورہی ہے : عرفان صدیقی

حال ہی میں لانچ کیے جانے والے ’اڑان پاکستان‘ کے بارے میں وفاقی وزیر احسن اقبال کا کہنا تھاکہ ہماری کوشش ہےکہ اس معاشی منصوبے کو سیاست سے بالاتر رکھیں اور ہم نے تمام صوبوں سے اس پر رائے لی ہے۔

ملک میں انٹرنیٹ کی سست رفتاری سے متعلق ایک سوال کے جواب میں ان کاکہنا تھاکہ انٹرنیٹ دنیا میں مواقع کے ساتھ ساتھ ایک خطرہ بھی ہےاور دنیا کا ہر ملک مختلف انداز میں اس سے نمٹ رہا ہے۔ان کا کہنا تھاکہ فائر وال بنانا ہماری ضرورت ہے۔