ملک بھر میں 78 واں یوم آزادی منایا جا رہا ہے
ملک بھر میں 78 واں یوم آزادی جوش و جذبے کے ساتھ منایا جا رہا ہے،رواں سال یوم آزادی کو معرکہ حق کی عظیم فتح سے منسوب کیاگیا ہے۔
آج کے دن کے آغاز پر توپوں کی سلامی دی گئی اور نماز فجر میں ملکی ترقی، یکجہتی، امن اور خوش حالی کےلیے خصوصی دعائیں کی گئیں۔
بھارت کےخلاف تاریخی فتح اور آزادی کا جشن، ملک کا ہر شہر، ہر گلی، محلہ سبز ہلالی پرچم کے رنگوں میں رنگ گیا۔کراچی، اسلام آباد، لاہور،کوئٹہ، پشاور اور ملتان سمیت ملک کے کونے کونے میں چراغاں اور آتش بازی کا مظاہرہ کیا گیا۔ یوم آزادی منانے شہری سڑکوں پر نکل آئے،جگہ جگہ جشن آزادی پر ریلیاں نکالی جا رہی ہیں۔
علاوہ ازیں بدھ کو جناح اسپورٹس کمپلیکس اسلام آباد میں یومِ آزادی اور معرکہ حق کی فتح کی تقریب منعقد کی گئی۔ تقریب میں صدر مملکت آصف علی زرداری،وزیرِاعظم شہباز شریف اور تینوں مسلح افواج کے سربراہان شریک ہوئے۔تقریب میں وفاقی کابینہ کے ارکان،قومی اسمبلی اور سینیٹ ارکان اور دوست ممالک کے سفراء سمیت بڑی تعداد میں شہری بھی شریک ہوئے۔
تقریب میں تینوں مسلح افواج پر مشتمل میوزک بینڈ کا شاندار مارچ پاسٹ کیا جب کہ پاک آرمی،پاک بحریہ اور پاک فضائیہ کےچاق چوبند دستوں سمیت پنجاب رینجرز،ایف سی خیبر پختونخوا کے دستوں نے بھی مارچ پاسٹ کیا۔
یومِ آزادی اور معرکہ حق کی فتح کی تقریب میں وزیر اعظم شہباز شریف نے یادگارِ معرکہ حق کے ماڈل کی نقاب کشائی بھی کی۔
