33 سیکنڈ میں دنیا کی تیکھی ترین 10مرچیں کھانے کاعالمی ریکارڈ

امریکی ریاست کیلیفورنیا میں ایک شخص نے دنیا کی تیز ترین دس تیکھی ترین مرچیں کھاکر عالمی ریکارڈ بنا ڈالا۔

میڈیا رپورٹس کے مطابق ایک شخص نےغیرمعمولی ہمت دکھاتے ہوئے دنیا کی تیز ترین دس ایسی مرچیں کھائی ہیں جوعام افراد ایک بھی حلق سے نہیں اتار سکتے۔ کیرولینا ریپر نامی مرچ زبان پر رکھنا بھی محال ہے کیونکہ اس کے غیرمعمولی کیمیکل منہ میں ہولناک جلن پیدا کرتے ہیں۔

رپوٹس کے مطابق یہ ریکارڈ سان ڈیاگو میں بنایا گیا ہے جب گریگری فوسٹر نے صرف 33.15 سیکنڈ میں دنیا کی دس تیزترین مرچیں چٹ کرڈالیں اور کھڑے رہے۔ آٹھ ماہ قبل انہوں نے 8.72 سیکنڈ میں ایسی ہی تین مرچیں کھائی تھیں جس پر ایک ریکارڈ اپنے نام کیا تھا۔

میڈیا رپورٹس کے مطابق کیرولینا ریپر نامی ایک مرچ کی شدت کا اندازہ یوں لگائیں کہ اس میں 1,641,183 اسکوویل ہیٹ یونٹ ہوتے ہیں جو اس کی تیزی اور ترشی کو ظاہرکرتے ہیں۔ عام جلیپانو مرچ کی شدت عام طور پر 2 سے 8 ہزار یونٹ تک ہوتی ہے۔ یہی وجہ ہے کہ اس کا ایک ٹکڑا بھی 30 سیکنڈ تک زبان پر نہیں رکھا جاسکتا۔ عام افراد اسے کھانے کے بعد گرسکتے ہیں، قے کرتے ہیں اور جلن سے رونے لگتے ہیں۔