رؤف حسن اورگوہر خان کی ایف آئی اے پیشی کی اندرونی کہانی آ گئی

عمران خان کے ایکس اکاؤنٹ سے وائرل پوسٹ کے معاملے پر رؤف حسن اور گوہر خان کی  ایف آئی اے پیشی کی ا ندرونی کہانی منظر عام پر آگئی۔

ذرائع کے مطابق انکوائری افسر کو بیرسٹر گوہر نے دوران تفتیش بتایا کہ انہیں نہیں معلوم کہ سوشل میڈیا اکاؤنٹ کون آپریٹ کر رہا ہے۔

زرائع کے مطابق ایف آئی اے سائبر کرائم  میں متنازعہ ویڈیو کے حوالے سے آج رؤف حسن سے 4 گھنٹے اور بیرسٹر گوہر سے تقریباً 2 گھنٹے تک مختلف سوالات پوچھے گئے،متنازعہ ویڈیو کے مواد سے متفق ہونے کے حوالے سے گوہر خان نے کہا کہ تصادم اس حد تک نہیں جانا چاہئے اور ہمیں اس کا کوئی پرامن حل نکالنا چاہئے۔

 ذرائع کے مطابق بیرسٹر گوہر اس متنازعہ ویڈیو کو اپ لوڈ کرنے کے خیال سے قطعی طور پر متفق نہیں تھے اور گوہر خان نے تصدیق کی کہ  جبران الیاس اور اظہر مشوانی بیرون ملک سے  بیٹھ کر سوشل میڈیا اکاؤنٹ چلاتے ہیں اور وہی بنیادی طور اس کی پالیسی کے ذمہ دار ہیں اور یہ ویڈیوز بناتے ہیں، گوہر خان نے لاتعلقی کا اظہار بھی کیا۔

 ذرائع کے مطابق سوال کیا کہ پارٹی نے سوشل میڈیا پالیسی غیر ملکی سرزمین پر بیٹھے لوگوں کے حوالے کیوں کی۔۔۔؟

 بیرسٹر گوہر تسلی بخش وضاحت نہ دے سکے اور کہا کہ ان کی پارٹی میں شمولیت سے قبل یہ معاملات طے پا چکے تھے۔

رؤف حسن نے دوران انکوائری سوالات کا جواب دیتے ہوئے کہا کہ سوشل میڈیا کی سربراہی  امریکا میں بیٹھے جبران الیاس کر رہے ہیں اور وہی اس کے ذمہ دار ہیں۔ان کے پاس اس بنیاد کی معلومات نہیں ہے جس کی وجہ سے یہ ویڈیو اپ لوڈ کی گئی۔

 ذرائع کے مطابق سوال کیا گیا کہ موجودہ عسکری قیادت کی تصویر لگا کر کیا ممثاثلت پیش کی جا رہی ہے۔

 رؤف حسن نے کہا کہ وہ یہ باتیں بانی جماعت کے نوٹس میں لائیں گے اور ان کے جوابات حاصل کرینگے۔

بیرسٹر گوہر انکوائری کے دوران متنازعہ ویڈیو کا جواز پیش کرنے میں ناکام رہے۔،

جبکہ رؤف حسن نے بھی ویڈیو کو سوشل میڈیا ٹیم سے منسوب کردیا۔

دوسری جانب عمر ایوب انکوائری کیلئے پیش نہ ہوئے اور اپنا وکیل بھیجا۔