پاکستان کے خلاف کارروائیاں ناجائز قرار، افغان طالبان کا فتنۃ الخوارج کو انتباہ
افغان طالبان نے فتنۃ الخوارج کو واضح انتباہ جاری کر دیا ہے اور پاکستان میں ان کی کارروائیوں کو ناجائز قرار دے دیا۔ بیرون ملک جہاد کرنے والے حقیقی مجاہد نہیں۔
تفصیلات کے مطابق افغان طالبان کے کمانڈر سعیداللہ سعید نے پولیس اہلکاروں کی پاسنگ آؤٹ تقریب سے خطاب میں فتنۃ الخوارج کو تنبیہ کرتے ہوئے کہا کہ امیر کے حکم کے خلاف کسی بھی ملک خصوصاً پاکستان میں لڑنا جائز نہیں۔ مختلف گروہوں میں شامل ہوکر بیرون ملک جہاد کرنے والے حقیقی مجاہد نہیں، ایک جگہ سے دوسرے جگہ حملے کرنے والے افراد کو مجاہد کہنا غلط ہے۔
کمانڈر سعیداللہ سعید نے کہاکہ جہاد کا اعلان یا اجازت دینا صرف ریاستی امیر کا اختیار ہے کسی گروہ یا فرد کا نہیں،اگر ریاستی قیادت پاکستان نہ جانےکا حکم دے چکی ہے تو اس کے باوجود جانا نافرمانی ہے، اپنی انا یا گروہ کی وابستگی کی بنیاد پر کیاگیا جہاد شریعت کےمطابق فساد تصور کیا جائےگا۔ جہاد کے نام پر حملے کرنے والے گروہ شریعت اور افغان امارت دونوں کے نافرمان ہیں۔
اس حوالے سے دفاعی ماہرین کا کہنا ہےکہ یہ بیان پاکستان کی داخلی سلامتی،بیانیے اور عالمی سطح پر سفارتی مؤقف کو مضبوط کرتا ہے، بھارتی پراکسیز اور بھارتی ایما پر فتنۃ الخوارج کا نام نہاد جہاد دراصل شریعت، ریاست اور امن کے خلاف دہشت گردی ہے۔
