امیر المومنین افغان شہریوں کی واپسی سے خوش ہیں : افغان قونصل جنرل

افغان قونصل جنرل حافظ محب اللہ شاکر کا کہنا ہے کہ امیر المومنین افغان شہریوں کی واپسی سے خوش ہیں، افغان حکومت نے پاکستان میں مقیم افغان شہریوں کی واپسی کےلیے مکمل تیاری کرلی ہے اور اس حوالے سے خصوصی کمیشن بھی قائم کردیا گیا ہے۔

پشاور میں تعینات افغان قونصل جنرل حافظ محب اللہ شاکر نے افغان قونصل خانے میں پریس کانفرنس کرتے ہوئے کہا کہ افغان شہریوں کی وطن واپسی کےلیے کیمپ قائم کیے گئے ہیں اور انہیں ٹرانسپورٹ سمیت تمام سہولیات فراہم کی جارہی ہیں تاکہ انہیں کسی قسم کی پریشانی کا سامنا نہ ہو۔

قونصل جنرل کاکہنا تھاکہ امیر المومنین افغان شہریوں کی واپسی سے خوش ہیں۔ پاکستان میں رہنے والے افغانوں نے یہاں چار دہائیوں تک تعلیم،کاروبار اور روزگار کے مواقع سے فائدہ اٹھایا اور یہاں حلال رزق کمایا،جس پر ہم پاکستان کے مشکور ہیں۔ تاہم اب وقت آ گیا ہےکہ وہ اپنے وطن واپس جاکر اس کی ترقی میں حصہ ڈالیں۔

حافظ محب اللہ شاکر نے کہاکہ افغانستان اب آزاد ہے،وہاں نہ روسی افواج ہیں اور نہ ہی امریکی اور ملک میں امن و استحکام کی فضا قائم ہے۔افغانستان میں پانی اور زمین کی کوئی کمی نہیں،پورا ملک آباد کیا جائےگا۔

خواتین کی تعلیم کے حوالے سے پوچھےگئے سوال پر حافظ محب اللہ نےکہا کہ اسلام تعلیم کا درس دیتا ہےاور افغانستان میں تعلیم پر کوئی پابندی نہیں ہے، تاہم طرز تعلیم پر نظر ثانی کی جارہی ہے۔ خواتین کی تعلیم کےلیے الگ ادارے قائم کیے جائیں گے تاکہ ان کےلیے محفوظ ماحول میسر ہو۔‘

انہوں نے کہاکہ اب تک 76 ہزار افغان مہاجرین پاکستان سے افغانستان واپس جاچکے ہیں اور باقی شہریوں سے بھی درخواست ہےکہ وہ وطن واپسی کی تیاری کریں۔

بی این پی نے لکپاس پر 20 روز سے جاری دھرنا ختم کرنےکا اعلان کردیا

ان کا مزید کہنا تھا کہ پاکستان سے کوئی شکایت نہیں، یہاں مہاجرین کے ساتھ مکمل تعاون کیاگیا، لیکن اپنا وطن،اپنا ہی ہوتا ہے۔افغانستان کے مشران اپنے عوام کے ساتھ کھڑے ہیں،کسی کو تشویش کی ضرورت نہیں۔