کیا بلوچ علیحدگی پسند جس شاخ پر بیٹھے ہیں اسی کو کاٹ رہے ہیں؟

معروف لکھاری اور تجزیہ کار عمار مسعود نے کہا ہے کہ بلوچستان میں دہشت گردی میں ملوث عناصر دراصل جس تھالی میں کھاتے ہیں، اسی میں چھید کرتے ہیں۔ وہ جس شاخ پر بیٹھے ہیں، اسی کو کاٹ رہے ہیں، انہوں نے جس دھرتی پر جنم لیا ہے، اسی کے خلاف نعرے لگا  رہے ہیں۔ یہ بلوچستان سے دوستی نہیں بلکہ بلوچوں اور بلوچستان سے سب سے بڑی دشمنی ہے۔ انکا کہنا ہے کہ اگر ان دہشت گرد تنظیموں کو بلوچستان کی فلاح عزیز ہوتی تو یہ وہاں پھیلی غربت کے خلاف احتجاج کرتے، بے روزگاری کے خاتمے کے لیے آواز بلند کرتے، جہالت کو ختم کرنے کے لیے یونیورسٹیوں کا مطالبہ کرتے، مگر انہوں نے ریاست کے خلاف مزاحمت کا رستہ اپنایا، یہ جانتے ہوئے بھی کہ ریاست کسی بھی دہشت گرد گروپ سے زیادہ طاقتور ہوتی ہے۔

اپنے تازہ تجزیے میں عمار مسعود کہتے ہیں کہ ماضی کا سب سے بڑا المیہ یہ ہے کہ اسے تبدیل نہیں کیا جا سکتا۔ اس پر خوشیاں منائی جا سکتی ہیں، اس پر جشن منایا جا سکتا ہے یا پھر اس پر آنسو بہائے جا سکتے ہیں، اس پر ماتم کیا جا سکتا ہے مگر اسے تبدیل نہیں کیا جا سکتا۔ یہ ایک آفاقی حقیقت ہے مگر بلوچستان کے حوالے سے یہ سچ زیادہ تکلیف دہ ہے۔ بلوچستان کے ماضی میں بہت ابہام بھی ہے، دھوکہ بھی ہے، بے وفائی ہے، تکالیف بھی ہیں، جبر بھی ہے اور صبر بھی ہے۔

عمار مسعود کا کہنا ہے کہ تاریخ کا سبق یہی ہے کہ بلوچوں کے ساتھ وفا کرنے والے کم رہے ہیں اور جفا کرنے والے بے شمار۔ کوئی بلوچستان کی تاریخ کو خان آف قلات سے شروع کرتا ہے اور کہتا ہے کہ ان کے ساتھ دھوکہ ہوا۔ کوئی ماتم کرتا ہے کہ خان آف قلات نے دھوکہ دیا۔ کوئی ایوب خان کو الزم دیتا ہے اور کوئی ان کو ہیرو قرار دیتا ہے ۔ کوئی نیپ کی حکومت گرانے پر بھٹو کو الزام دیتا ہے، کوئی اکبر بگٹی کو بلوچوں پر ستم کی وجہ قرار دیتا ہے۔ کوئی 70 کی دہائی کو خونچکاں قرار دیتا ہے، کوئی 80 کی دہائی پر دہائی دیتا ہے۔ کوئی مشرف کو بگٹی کا قاتل بتاتا ہے کوئی مشرف کو محسن بلوچستان بتاتا ہے۔ کوئی گوادر کو گیم چینجر بتاتا ہے، کوئی اس کی بین الاقوامی اہمیت کو وجہ عناد بتاتا ہے۔ کسی کے خیال میں ساری دنیا کی نظر بلوچستان کے پہاڑوں میں دفن معدنیات پر ہے، کوئی ان پہاڑوں کو فراریوں اور دہشتگردوں کی آماجگاہ بتاتا ہے۔ کوئی ایران کو دوش دیتا ہے کوئی افغانستان پر الزام دھرتا ہے اور کوئی چین پر انگلی اٹھاتا ہے۔  کوئی ماہ رنگ بلوچ کے حق میں ہے، کوئی دہشتگردوں کے ذریعے غیر بلوچوں کی نسل کشی پر پشیمان ہے۔ کوئی بی ایل اے کو نجات دہندہ کہتا ہے۔ کوئی  اس پر ’را‘ کے ایجنٹ ہونے کا الزام لگاتا ہے۔

تاہم عمار مسعود کے مطابق سچ یہ ہے بلوچوں کے ساتھ وفا کسی نے نہیں کی۔ سرداری نظام نے بلوچوں کو صرف مطیع بنایا اور استعمال کیا۔ اس نظام نے بلوچوں کو کیا دیا اس سوال کے جواب میں تاریخ خاموش ہے۔ کوئی ڈکٹیٹروں کو الزام دیتا ہے، کوئی مفاد پرست سیاست دانوں کو دوش دیتا ہے، کسی کے خیال میں بیورو کریسی بلوچستان کو کھا گئی، کسی کے خیال میں افغان جنگ بلوچوں کو مروا گئی۔ کوئی کہتا ہے کہ سیاسی جماعتوں میں گھس بیٹھیوں نے بلوچستان کو حق نہیں ملنے دیا۔ کوئی کہتا ہے کہ آزادی اظہار کی قدغنوں نے بلوچستان کی آواز بلند نہیں ہونے دی۔ یہ الزامات تاریخ کا حصہ ہیں۔ یہی بلوچستان کا ماضی ہیں مگر ماضی کا مسئلہ یہ ہے کہ اسے تبدیل نہیں کیا جا سکتا۔

عمار کا کہنا ہے کہ بلوچستان میں دو قوتیں ایک دوسرے سے نبرد آزما دکھائی دیتی ہیں۔ ایک قوت کی وجہ سے دہشتگردی کے حملوں میں اضافہ ہو رہا ہے۔ بسوں سے غیر بلوچوں کو نکال  کر قتل کیا جا رہا ہے۔ بلوچستان میں نوجوان خواتین کو بلیک میل کر کے انہیں خود کش بننے پر مجبور کیا جا رہا ہے۔ بی ایل اے اور بی وائے سی جیسی علیحدگی پسند آوازیں اٹھ رہی ہیں۔ سیکیورٹی فورسز پر حملے کیے جا رہے ہیں۔ بلوچستان کے پہاڑوں سے خون بہہ رہا ہے۔ اور حال کی دوسری صورت یہ ہے کہ سعودی عرب ریکوڈک میں سرمایہ کاری کرنے پر رضامند دکھائی دیتا ہے۔ گوادر پورٹ دنیا کی آنکھ کا تارا بنتی جا رہی ہے۔ وزیر اعظم اکثر بلوچستان کا دورہ کر کے بلوچ قیادت سے رابطہ کرتے ہیں، ان کے دکھ سکھ سنتے ہیں۔ وفاق بلوچستان کے حقوق پورے کرنے میں مدت سے سرگرم عمل ہے۔

2008 میں پیپلز پارٹی کے ’آغاز حقوق بلوچستان‘ سے لے کر آج تک  بلوچوں کو وفاق اپنا پیٹ کاٹ کر حصہ دے دہا ہے۔ بلوچستان سے وفاقی خزانے میں آنے والی رقم نہ ہونے کے برابر ہے مگر وفاق سے بلوچستان جانے والے فنڈز کثیر ہیں۔ ان سب اقدامات کے باوجود بلوچستان کی محرومی دور نہیں ہو رہی ہے۔ عمار مسعود کہتے ہیں کہ اگر بلوچستان میں منفی اور مثبت قوتوں کی جنگ اسی طرح چلتی رہی تو محرومی کے اس احساس میں اضافہ ہو گا، چاہے یہ کتنا ہی جھوٹ کیوں نہ ہو۔ ماضی اور حال کی تفصیل جان کر بلوچستان کے مستقبل کا اندازہ لگایا جا سکتا ہے۔

انکے مطابق بلوچوں نے فیصلہ کرنا ہے کہ بلوچستان کس کے ساتھ ہے۔ کیا وہ سمجھتے ہیں کہ خود کش دھماکے کرنے والے بلوچستان سے مخلص ہیں؟ کیا شناختی کارڈ دیکھ کر لوگوں کو ذبح کرنے والے بلوچستان کے ہمدرد ہیں؟ کیا ٹرینوں کو ہائی جیک کرنے والے بلوچستان کا بھلا چاہتے ہیں؟ ان سب سوالات کے جوابات نفی میں ہیں۔ جو لوگ ان واقعات میں ملوث ہیں، دراصل وہ جس تھالی میں کھاتے ہیں اسی میں چھید کرتے ہیں۔ جس شاخ پر بیٹھے ہیں اسی کو کاٹ رہے ہیں، یہ بلوچستان سے دوستی نہیں بلکہ بلوچوں سے بڑی دشمنی ہے۔ ان دہشتگرد تنظیموں کو اگر بلوچستان کی فلاح عزیز ہوتی تو یہ بلوچستان میں پھیلی غربت کے خلاف احتجاج کرتے، بے روزگاری کے خاتمے کے لیے لڑتے، یہ لوگ بلوچستان کی ترقی کے لیے انفراسٹرکچر کی بات کرتے مگر انہوں نے ریاست کے خلاف مزاحمت کا رستہ اپنایا۔ یہ جانتے ہوئے بھی کہ دنیا بھر میں ریاست کی طاقت کو چیلنج کرنے والے نیست و نابود ہو جاتے ہیں۔ خود دیکھیں کہ چین نے باغیوں کو کیسے کچلا، روس میں ریاست سے لڑنے والوں کا کیا حشر ہوا۔ امریکا میں کیپٹل ہل پر حملہ کرنے والوں کے ساتھ کیا بنی۔ برطانوی فسادات میں سرکاری املاک پر حملے کرنے والوں کا کیا حشر ہوا۔

تحریک طالبان میڈیا ونگ کی فوج مخالف نئی حکمت عملی کیا ہے؟

عمار مسعود کہتے ییں کہ یہ مثالیں اس لیے دینا ضروری ہیں کہ ریاست پاکستان بھی اپنی سلامتی کے معاملے میں مختلف نہیں ۔ یہاں بھی بات اگر ریاست کی سلامتی پر آ گئی تو کوئی دہشتگرد گروپ نہیں بچے گا ۔ تو یہ سمجھ لیجیے کہ بلوچستان کا مستقبل صرف اور صرف  پاکستان سے وابستہ ہے۔ یاد رکھیے کہ جب سبز پرچم کو بلوچستان کے کونے کونے میں پوری حرمت سے لہرایا جائے گا تو بلوچستان دہشتگردی کے اس بھنور سے نکل آئے گا۔ یہی بلوچستان کے مسائل کا حل ہے یہی درس سات دہائیوں کی ریاضت کا نتیجہ ہے۔ یہ واحد طریقہ ہے، جس سے بلوچستان کے ماضی کی تلخیاں دور ہوں گی، حال روشن بنے گا اور مستقبل تابناک رہے گا۔