بلوچستان دہشت گرد حملہ : میجر سمیت 3 اہلکار شہید
بلوچستان کے ضلع مستونگ میں فتنۃ الہندوستان سے تعلق رکھنے والے دہشت گردوں نے سکیورٹی فورسز کی گاڑی کو بارودی سرنگ سے نشانہ بنایا،جس کے نتیجے میں میجر اور دو فوجی جوان شہید ہوگئے۔
آئی ایس پی آر کےمطابق 5 اور 6 اگست کی درمیانی شب فتنہ الہندستان سے تعلق رکھنے والے دہشت گردوں نے ضلع مستونگ میں سکیورٹی فورسز کی ایک گاڑی کو دیسی ساختہ بارودی سرنگ (آئی ای ڈی) سےنشانہ بنایا۔
پاک فوج کے شعبہ تعلقات عامہ کےمطابق حملے کے نتیجے میں مادر وطن کے تین بہادر سپوت مادر وطن پر قربان ہوکر شہادت کے عظیم رتبے پر فائز ہوگئے،جن میں ضلع نارووال سے تعلق رکھنےوالے 31 سالہ میجر محمد رضوان طاہر،ضلع صوابی کے 37 سالہ نائیک ابن امین اور ضلع کرک کے لانس نائیک محمد یونس شامل ہیں۔
آئی ایس پی آر کے مطابق واقعے کےبعد کیے جانے والے سرچ اینڈ کلیئرنس آپریشن میں بھارتی سرپرستی میں کام کرنےوالے 4 دہشت گردوں کو ہلاک کر دیا گیا۔علاقے میں کلیئرنس آپریشن جاری رہےگا،تاکہ کسی بھی چھپے ہوئے دہشتگرد کو ختم کیا جاسکے۔سکیورٹی فورسز بھارتی سرپرستی میں ہونےوالی دہشت گردی کے مکمل خاتمہ کےلیے پرعزم ہیں،بہادر جوانوں کی قربانیاں ہمارےاس عزم کو مزید تقویت بخشتی ہیں۔
