پہلی مرتبہ امریکی ڈالر 192 روپے سےمتجاوز

ملکی تاریخ میں پہلی بارپاکستانی روپے کے مقابلے میں امریکی ڈالر کی قدر 192 روپے سے تجاوز کر گئی۔
فاریکس رپورٹ کے مطابق انٹر بینک اور اوپن مارکیٹ میں ڈالر کے مقابلے میں پاکستانی روپیہ کی قدر میں گراوٹ کا سلسلہ جاری ہے جس کے بعد ملکی تاریخ میں پہلی مرتبہ انٹر بینک میں ڈالر 191 اعشاریہ 77 روپے اور اوپن مارکیٹ میں 192 روپے سے تجاوز کرگیا۔

رپورٹ کے مطابقانٹر بینک میں روپے کے مقابلے میں ڈالر کی قدر میں 1.90 روپے کا اضافہ ریکارڈ کیا گیا جس سے ڈالر کی قیمت خرید 189.90روپے سے بڑھ کر191.60روپے اور قیمت فروخت190.10روپے سے بڑھ کر192.00روپے ہو گئی۔ مقامی اوپن کرنسی مارکیٹ میں ڈالر کی قیمت خرید 191روپے اور قیمت فروخت 192روپے پر برقرار رہی تاہم ایک موقع پر اوپن مارکیٹ میں ڈالر193روپے تک بھی فروخت کیا گیا۔

ماہرین کے مطابق یکم اپریل سے اب تک ڈالر ساڑھے سات روپے سے بھی زائد مہنگا ہوچکا ہے، سیاسی عدم استحکام اور آئی ایم ایف سے بات چیت میں ناکامی کی وجہ سے ڈالر بے قابو ہوگیا ہے۔

یاد رہے کہ بیرونی ادائیگیوں اور درآمدی بل کی وجہ سے زرمبادلہ کے ذخائر پر پڑنے والے دباؤ سے شرح مبادلہ بھی کم ہورہی ہے۔نئی حکومت تاحال سعودی عرب، متحدہ عرب امارات اور کویت سمیت دوست ملکوں سے کوئی بیل آؤٹ پیکج لینے میں ناکام رہی ہے جب کہ چین سے بھی حال ہی میں پوری ہونے والی قرضے کی مدت میں بھی توسیع نہ ہوسکی اور آئی ایم ایف سے مذاکرات میں بھی خدشات درپیش ہیں، زرمبادلہ کے ذخائر میں کمی، قرضوں کی مدت میں توسیع، بیل آؤٹ پیکج سمیت کئی مسائل کے اثرات فاریکس مارکیٹ پر بھی مرتب ہورہے ہیں جس سے روپے کی قدر کمی کاشکار ہے۔