کینالز کے معاملے پر اتفاق رائے سے عمل ہوگا : رانا ثناء اللہ

وزیر اعظم کے مشیر برائے سیاسی امور رانا ثناء اللہ کا کہنا ہے کہ وزیر اعظم نے پیپلز پارٹی کو یقین دلایا ہےکہ کینالز کے معاملے پر بیٹھ کر بات کریں گے، کینالز کےمعاملے پر جو اتفاق رائے سے فیصلہ ہوگا اس پر عمل ہوگا۔ کینالز پر سندھ میں جس طرح کی سیاست ہورہی ہے پیپلزپارٹی کو اس اسپیس کو کور کرنا چاہیے۔

مرکزی رہنما مسلم لیگ ن رانا ثنا اللہ کا کہنا ہے کہ معاملہ تب بگڑے گا جب کسی ایشو پر تصادم یا ضد کی صورت حال ہو، وزیر اعظم شہباز شریف سے میٹنگ میں بلاول بھٹو،خورشید شاہ، گورنر پنجاب اور پیپلز پارٹی کی دیگر قیادت بھی موجود تھی۔

رانا ثنا اللہ نے کہاکہ وزیر اعظم نے پیپلز پارٹی کو یقین دلایا کہ 6 کینال کے معاملے بیٹھ کر بات کریں گے،کینالز کے معاملے پر جو اتفاق رائے سے فیصلہ ہوگا اس پر عمل ہوگا۔

لیگی رہنما نے کہاکہ سندھ میں 6 کینالز کے معاملے پر اونر شپ کا مسئلہ ہے،یہ اونر شپ پیپلز پارٹی کو لینی ہی پڑےگی وہ نہیں لیں گے تو کوئی اور لےگا، پیپلز پارٹی ان چیزوں کو سمجھتی ہےاس اسپیس کو پر کریں گے،پیپلز پارٹی اس مسئلے پر اونر شپ لےگی تو درست فیصلہ کرے گی،کینالز پر سندھ میں جس طرح کی سیاست ہورہی ہے پیپلزپارٹی کو اس اسپیس کو کور کرنا چاہیے۔

جعفر ایکسپریس 16 روز بعد بحال ہوگئی

بلوچستان کی صورت حال پر گفتگو کرتے ہوئے رانا ثنا اللہ کا کہنا تھا کہ ن لیگ کی قیادت بلوچستان کے مسائل پر فکر مند بھی ہے اور ان مسائل پر نظر بھی ہے، دہشت گردوں نے ٹرین کو یرغمال بنایااور بےگناہ لوگوں کو قتل کیا،یہ دہشت گرد کسی قسم کی ہمدردی کے مستحق نہیں ہیں۔