اسلام آباد ہائی کورٹ میں تین صوبائی ہائی کورٹس سے ججز ٹرانسفر کرنے کا فیصلہ

اسلام آباد ہائی کورٹ میں لاہور، سندھ اور بلوچستان ہائی کورٹ سے ایک،ایک جج کو ٹرانسفر کرنے کا حتمی فیصلہ کر لیا گیا ہے۔
ذرائع کے مطابق اسلام آباد میں اعلیٰ سطح کا اجلاس منعقد ہوا جس میں اعلیٰ عدالتی شخصیات اور وزراء بھی شامل تھے،اجلاس میں مجموعی طور پر تینوں ہائی کورٹس سے ایک،ایک جج کو اسلام آباد ہائی کورٹ میں ٹرانسفر کرنے کا حتمی فیصلہ کیاگیا ہے۔
ذرائع نے بتایا ہےکہ اس حوالےسے چیف جسٹس لاہور ہائی کورٹ سے مشاورت کا عمل کرلیا گیا ہے جب کہ سندھ ہائی کورٹ اور بلوچستان ہائی کورٹ سےایک، ایک جج کو ٹرانسفر کرنے کےلیے خط و کتابت بھی حتمی مراحل میں داخل ہو چکی ہے۔
ذرائع کابتانا ہےکہ لاہور ہائی کورٹ سے جسٹس سردار محمد سرفراز ڈوگر کو اسلام آباد ہائی کورٹ ٹرانسفر کیا جائےگا جو بطور سینئر جج اسلام آباد ہائی کورٹ میں فرائض سر انجام دیں گے اور پھر چیف جسٹس عامر فاروق کے سپریم کورٹ کا جج بننے کےبعد جسٹس سردار محمد سرفراز ڈوگر کو چیف جسٹس اسلام آباد ہائی کورٹ مقرر کر دیا جائے گا۔
اسی طرح سندھ ہائی کورٹ اور بلوچستان ہائی کورت سے بھی ایک،ایک جج کو اسلام آباد ہائی کورٹ میں ٹرانسفر کیا جائےگا جس کے بعد اسلام آباد میں ججز کی تعداد 10 سے بڑھ کر 13 ہوجائے گی۔
جوڈیشل کمیشن سے پشاور ہائیکورٹ کے لیے 10 ایڈیشنل ججز کی منظوری
تینوں ہائی کورٹس سے 3 ججز کو اسلام آباد ہائی کورٹ ٹرانسفر کرنے سے متعلق اعلیٰ سطح کے اجلاس میں مشاورت مکمل ہوچکی ہے،اس حوالے سے صدر پاکستان آئین کے آرٹیکل 200 کے تحت احکامات جاری کریں گے جس کا نوٹی فکیشن جلد جاری ہونےکا امکان ہے۔