ڈونلڈ ٹرمپ نے صدارت سنبھالتے ہی متعدد ایگزیکٹو آرڈرز پر دستخط کردیے

نو منتخب امریکی صدر ڈونلڈ ٹرمپ نے صدارت سنبھالتے ہی بائیڈن انتظامیہ کے 78 صدارتی اقدامات منسوخ کردیے اور متعدد نئے ایگزیکٹو آرڈرز پر دستخط کردیے۔

امریکی صدر ڈونلڈ ٹرمپ کی حلف برداری تقریب کےبعد کیپٹل ون ارینا میں تقریب کا اہتمام کیاگیا جس میں ٹرمپ کے حامیوں کی بڑی تعداد نے شرکت کی اور پولیس سمیت مختلف اداروں کے دستوں کی جانب سے نومنتخب صدر کو سلامی دی گئی۔

اس موقع پر صدر ڈونلڈ ٹرمپ نے متعدد ایگزیکٹو آرڈرز پر دستخط کیے اور سابق صدر جو بائیڈن کے 78 صدارتی اقدمات بھی منسوخ کردیے۔

وائٹ ہاؤس کےمطابق صدر ٹرمپ نے کیپٹل حملے میں ملوث 1500 افراد کو معافی دینےکے آرڈر پر دستخط کیے۔

صدر ٹرمپ نے فیڈرل ملازمین کی بھرتیاں منجمد کرنےکے آرڈر پر دستخط کردیے۔ ڈونلڈ ٹرمپ نے فیڈرل ملازمین کےلیے گھر سے کام کرنے کے سہولت بھی ختم کردی۔

ڈونلڈ ٹرمپ نے امریکا کی پیرس ماحولیاتی معاہدےسے علیحدگی کے آرڈر پر دستخط کیے اور ساتھ ہی مصنوعی ذہانت پالیسی سے متعلق بائیڈن کا ایگزیکٹو آرڈر منسوخ کر دیا۔

صدر ٹرمپ نے جو بائیڈن کا 2030 تک الیکٹرک کاروں کی فروخت کا ہدف 50 فیصد کرنےکا آرڈر بھی منسوخ کیا۔

ٹرمپ نے بارڈر سے متعلق اور تارکین وطن کے داخلے سےمتعلق ایگزیکٹو آرڈر پر دستخط کردیے، کارٹلز کو دہشت گرد تنظیم قراردیا۔جنوبی سرحد پر نیشنل ایمرجنسی نافذ کرنے کے آرڈر پر بھی دستخط کیے۔

صدر ٹرمپ نے بین الاقوامی ماحولیاتی معاہدوں میں امریکا کو اولین ترجیح دینےکے آرڈر پر دستخط کیے۔

اس کےعلاوہ ٹرمپ نے امریکی خاندانوں کو قیمتوں میں ایمرجنسی ریلیف دینے کے آرڈر پر بھی دستخط کیے جب کہ سیاسی مخالفین کےخلاف وفاقی حکومت کو مسلح کرنے کی پالیسی بھی منسوخ کردی۔

وائٹ ہاؤس کےمطابق ڈونلڈ ٹرمپ نے نگران کابینہ اور کابینہ سطح کے عہدوں کا بھی اعلان کیا،نگران کابینہ کے اراکین عہدوں پر باضابطہ تقرری تک خدمات انجام دیں گے۔

ٹرمپ نے اظہار رائےکی آزادی اور سنسر شپ ختم کرنےکے ایگزیکٹو آرڈر پر بھی دستخط کیے۔

صدر ٹرمپ نے ٹک ٹاک سے متعلق ایگزیکٹو آرڈر پر دستخط کیے ۔ٹرمپ کاکہنا ہےکہ ایگزیکٹو آرڈر ٹک ٹاک کو خریدنے یا بند کرنے اختیار دیتا ہے ہم نے ٹک ٹاک ڈیل کی اور چین نے توثیق نہیں کی تو چین پر ٹیرف عائد کرسکتے ہیں۔

ٹرمپ نے اٹارنی جنرل کو اگلے 75 دن تک ٹک ٹاک پر کوئی کارروائی نہ کرنےکا حکم دیتے ہوئے کہاکہ ٹک ٹاک سے متعلق ڈیل کر بھی سکتا ہوں ، ٹاک ٹاک ڈیل کی تو اس کی 50 فیصد ملکیت حاصل کرناہوگی،ڈیل نہیں کی تو ٹک ٹاک کسی کام کا نہیں رہے گا۔

ٹرمپ نے جسٹس ڈپارٹمنٹ کو 6 جنوری حملے سےمتعلق تمام مؤخر کیسز ختم کرنےکا بھی حکم دیا اور امریکی صدر نے عالمی ادارہ صحت سے علیحدہ ہونے کے آرڈر پر بھی دستخط کردیے۔

وائٹ ہاؤس کے مطابق ٹرمپ نے مجموعی طور پر سابق صدربائیڈن کے 78 صدارتی اقدمات کو منسوخ کرنے کی دستاویز پر دستخط کیے۔

ٹرمپ نے تقریب سے خطاب کرتے ہوئے کہاکہ جنوری کے یرغمالیوں سمیت بہت سے ملزمان کوعام معافی پر دستخط کرنے جارہے ہیں، بائیڈن دور میں آف شور ڈرلنگ پر عائد پابندی کو ختم کریں گے۔

صدر ٹرمپ کاکہنا تھاکہ پچھلی حکومت کےکم از کم 80 تباہ کن ایگزیکٹو آرڈرز کو منسوخ کریں گے،مہنگائی کو شکست دینے کےلیے ہر ممکن اقدامات کریں گے، مہنگائی کم کرنے کےلیے کابینہ کو ہر ممکن اقدامات کی ہدایت دوں گا، سول ملازمین کی تعداد کم، ان لینڈ ریونیو سروس ایجنٹس کی بھرتیاں روکیں گے۔

ڈونلڈ ٹرمپ نے کہاکہ روسی صدر پیوٹن سے ملاقات کروں گا، نہیں جانتا یہ ملاقات کب ہوگی۔

صدر ٹرمپ نے کہاکہ ہم یقیناً وینزویلا سے تیل خریدنا چھوڑ رہےہیں،میں حیران ہوں کہ بائیڈن نےاپنی پوری فیملی کو معافی دےدی، پہلے دن بہت سے ایگزیکٹو آرڈرز پر دستخط کرنا آمریت نہیں۔

وائٹ ہاؤس کےمطابق لیزا کینا سیکرٹری آف اسٹیٹ،رابرٹ سیلسیس سیکرٹری ڈیفنس کے فرائض انجام دیں گے۔

نومنتخب امریکی صدر ڈونلڈ ٹرمپ نے حلف اٹھالیا

یاد رہےکہ پیر کو نو منتخب امریکی صدر ڈونلڈ ٹرمپ نےعہدہ صدارت کا حلف اٹھایا، جس کےبعد وہ امریکا کے 47 ویں صدر بن گئے۔ امریکی سپریم کورٹ کے چیف جسٹس جان رابرٹس نے صدر ٹرمپ سے عہدےکا حلف لیا۔