عمران خان اور شاہ محمود قریشی سمیت دیگر کو رہا کیا جائے : عمر ایوب

قومی اسمبلی میں قائد حزب اختلاف عمر ایوب کاکہنا ہے کہ حکومت سے مذاکرات کے بارے میں ان کا واضح بیانیہ ہےکہ عمران خان اور شاہ محمود قریشی سمیت دیگر اسیروں کو رہا کیاجائے۔

اسلام آباد کی ضلعی عدالت میں پیشی کے موقع پر میڈیا سے گفتگو کرتےہوئے عمر ایوب کا کہنا تھاکہ مذاکرات میں ہمارا بہت واضح بیانیہ تھا کہ عمران خان، شاہ محمود قریشی اور دیگر اسیران کو رہا کیا جائے،دوسرے نمبر پر 9 مئی اور 26 نومبر کے ضمن میں کمیشن بنایا جائے۔

سینئر رہنما پی ٹی آئی عمر ایوب نے کہاکہ حکومتی ٹیم کو بتایا ہے اور یہ بھی کہا ہےکہ عمران خان سے ہماری ملاقات ہونی چاہیے،حکومت نے عمران خان کو غیر قانونی طور پر جیل میں رکھا ہوا ہے۔

انہوں نے کہاکہ ہم شروع سے کہہ رہےہیں کہ قانون کے مطابق کام نہیں ہوگا تو پھر سرمایہ کاری نہیں ہوگی اور لاقانونیت ہوگی، اناج غائب ہوگیا ہے،سردیوں میں لوڈشیڈنگ ہو رہی ہے۔

مذاکرات کا آخری دور کھلے اسٹیڈیم میں ہوگا : اسپیکر ایاز صادق

قبل ازیں اسلام آباد کی ڈسٹرکٹ سیشن کورٹ نے 26 نومبر کو ڈی چوک پر احتجاج میں شرکت کے خلاف درج مقدمہ میں عمر ایوب کی عبوری ضمانت میں 9 جنوری تک توسیع کر دی ہے۔

اسلام آباد کے تھانہ کورال میں درج مقدمے میں عمر ایوب ایڈیشنل سیشن جج راجہ آصف کی عدالت میں اپنے وکیل بابر اعوان کےہمراہ پیش ہوئے،جہاں تفتیشی آفیسر کے رخصت پر ہونےکی وجہ سے ریکارڈ پیش نہیں کیا جاسکا۔