عمران خان نے ضمنی انتخابات میں حصہ لینے سے واضح انکار کردیا ہے : علیمہ خان

علیمہ خان کا کہنا ہے کہ عمران خان نے حقیقی آزادی تک تحریک کا کہا ہے، ضمنی انتخابات سے متعلق عمران خان نے واضح کہا ہے کہ اس میں حصہ نہیں لینا۔

اسلام آباد میں سپریم کورٹ کے باہر میڈیا سے گفتگو کرتے ہوئے عمران خان کی ہمشیرہ علیمہ خان نے کہا کہ آج سپریم کورٹ میں 9 مئی کیسز کی سماعت کل تک ملتوی کر دی گئی ہے۔

علیمہ خان نے بتایا کہ عمران خان نے حقیقی آزادی تک تحریک کا کہا ہے، عمران خان نے ضمنی انتخابات سے متعلق واضح کہا ہے کہ اس میں حصہ نہیں لینا۔

دوسری جانب راولپنڈی کی انسداد دہشتگردی عدالت میں پی ٹی آئی کارکنان کے خلاف 26 نومبر کے احتجاج پر درج مقدمے کی سماعت ہوئی۔مقدمے کی سماعت اے ٹی سی کے جج امجد علی شاہ نے کی، اس موقع پر پراسکیوٹر ظہیر شاہ اور ملزمان کے وکلاء عدالت میں پیش ہوئے تھے۔

عدالت نے 4 ملزمان کو 4 ،4 ماہ قید کی سزا سنادی، ملزمان نےعدالت میں اپنے اقبالی بیانات بھی جمع کرادیے۔اقبالی بیان میں ملزمان نے عدالت کو بتایاکہ لیڈ رشپ کے اکسانے پر وہ پُرتشدد احتجاج میں شریک ہوئے۔اقبالی بیان میں ملزمان نے عدالت کو بتایاکہ وہ غریب مزدور ہیں،سزاؤں میں نظر ثانی کی جائے۔

یاد رہے کہ ملزمان کےخلاف تھانہ انجرا ضلع اٹک میں جلاؤ گھیراؤ کا مقدمہ درج تھا۔