عمران خان کی رہائی عدالتوں کے فیصلوں پر منحصر ہے : خواجہ آصف
وزیر دفاع خواجہ آصف نے عمران خان کو جیل سے بنی گالہ یا کہیں اور منتقل کرنے کی پیشکش کی تردید کرتے ہوئے کہا ہے کہ عمران خان کی رہائی کےلیے کوئی دباؤ نہیں،ان کی رہائی عدالتوں کے فیصلوں پر منحصر ہے۔
سیالکوٹ میں میڈیا سے گفتگو کرتے ہوئے مسلم لیگ ن کے مرکزی رہنما خواجہ آصف کا کہنا تھاکہ عمران خان کی رہائی کےلیے کوئی دباؤ نہیں،پی ٹی آئی کا ملک کو نقصان پہنچانےکا ہر حربہ ناکام ہوا۔
خواجہ آصف نے واضح کیاکہ حکومت کی جانب سے عمران خان کو جیل سے بنی گالہ یا کہیں اور منتقل کرنےکی کوئی پیش کش نہیں کی گئی،اس حوالے سے پی ٹی آئی کے دعوے میں کوئی صداقت نہیں۔
وفاقی وزیر خواجہ آصف نے کہاکہ عمران خان کی رہائی عدالتوں کے فیصلوں پر منحصر ہے،میں عدلیہ سے تعلق رکھتا ہوں نہ جوتشی ہوں کہ کوئی پیش گوئی کرسکوں،حکومت کی کوشش ہےکسی طرح سیاسی استحکام لایا جائے۔
خواجہ آصف نے کہاکہ عمران خان کو ہاؤس اریسٹ کرنے یا کہیں اور منتقل کرنے کےحوالے سے دعوے پی ٹی آئی والے خود ہی کرتےہیں۔
انہوں نے کہاکہ بیرون ملک موجود پاکستانیوں کی دعائیں رنگ لے آئیں اور یورپ کےلیے پروازیں بحال ہوئی ہیں، فلائٹس کی تعداد بتدریج بڑھائی جائے گی، برطانیہ کےلیے بھی جلد پروازیں چلائی جائیں گی،نارتھ امریکا تک یہ سلسلہ شروع کریں گے، 19 یورپی شہروں تک فلائٹس آپریٹ کی جائیں گی۔
صدر مملکت نے قومی اسمبلی اور سینیٹ کا اجلاس طلب کرلیا
وزیر دفاع نے کہاکہ سیالکوٹ میں جو پیداوار ہوتی ہے،ایکسپورٹ کی جاتی ہے، اس شہر کو ’بانڈڈ سٹی‘ قراردیا جانا چاہیے،یہاں بزنس کمیونٹی نے ایئرپورٹ بنایا، شہباز شریف نے بطور وزیر اعلیٰ اور نواز شریف نے بطور وزیر اعظم سیالکوٹ کےلیے قابل فخر کردار ادا کیا۔
