فلپائن : یونیورسٹی میں مسلح شخص کی فائرنگ، سابق میئر سمیت3 افراد ہلاک
فلپائن کی ایک یونیورسٹی میں مسلح شخص کی فائرنگ سے سابق میئر سمیت3 افراد ہلاک ہوگئے۔
عالمی میڈیا رپورٹس کے مطابق فائرنگ کا واقعہ فلپائن کی اٹینیو دی منیلا یونیورسٹی میں پیش آیا۔ فائرنگ کے وقت قانون کے طلبا کی گریجویشن کی تقریب جاری تھی اور والدین سمیت کئی سرکاری حکام بھی موجود تھے۔
رپورٹس کے مطابق فائرنگ کے واقعے میں ہلاک ہونے والوں میں سابق میئر اور ایک سیکیورٹی گارڈ بھی شامل ہے جب کہ تیسرے شخص کی شناخت کا عمل جاری ہے۔ حملہ آور کو تعاقب کے بعد پولیس نے زخمی حالت میں گرفتار کرلیا۔ملزم کی شناخت ظاہر نہیں کی گئی تاہم ملزم کا تعلق لامیتان شہر سے ہے جو شدت پسند مذہبی تنظیموں کا گڑھ سمجھا جاتا ہے اور بالخصوص ابوسیاف کے داعش سے تعلقات بھی ہیں۔تاحال کسی گروپ نے حملے کی ذمہ داری قبول نہیں کی۔
یاد رہے کہ شدت پسند جماعت ابو سیاف فلپائن میں حکومتی سیکیورٹی فورسز اور سرکاری عمارتوں پر حملوں میں ملوث رہی ہے اور فلپائنی فوج اس تنظیم کے سربراہ کو قتل کرنے کا کئی بار دعویٰ بھی کر چکی ہے۔
