فارن ٹیکس پر نظر ثانی کیلئے وزیرخارجہ کا وزیراعظم کو خط

وزیر خارجہ بلاول بھٹو زرداری نے سفارتکاروں پرعائد فارن الائونس ٹیکس پر نظر ثانی کیلئے وزیراعظم شہباز شریف کو خط لکھ دیا۔
باخبر ذرائع کے مطابق وزیر خارجہ بلاول بھٹو نے وزیراعظم شہباز کو خط دفتر خارجہ کے افسران کی جانب سے فارن الاؤنس ٹیکس پر شدید تحفظات کے اظہار کے بعد لکھا ہے۔

خط کے مطابق ملکی تاریخ میں پہلی بار بیرون ملک تعینات سفارتکاروں پر ٹیکس لگایا گیا ہے، سفارتخانوں میں وزارت خارجہ کے علاوہ دیگر اداروں کے افسران تعینات ہوتے ہیں، فارن الاؤنس ٹیکس کے نفاذ سے بیرون ملک تعینات سفارتکاروں کو مالی مسائل کا سامنا ہوگا، سفارتکاروں کی تنخواہوں میں اضافے کے بجائے نیا ٹیکس نافذ کیا گیا ہے۔

وزیر خارجہ کے خط میں کہا گیا ہے کہ فارن الاؤنس ٹیکس کا نفاذ وزارت خارجہ کی مشاورت کے بغیر کیا گیا ہے، ٹیکس کے نفاذ سے قبل وزارت خارجہ کو آگاہ نہیں کیا گیا، بلاول بھٹو نے وزیر اعظم شہباز شریف سے سفارتکاروں پر ٹیکس نافذ کرنے کے فیصلے پر نظرثانی کی درخواست کی ہے۔

ادھر وزارت خارجہ کے ذرائع کے مطابق فارن الاؤنس ٹیکس کے نفاذ کے باعث سفارتکاروں کو گزشتہ تنخواہ ادا نہیں کی گئی، تنخواہوں کی عدم ادائیگی کے باعث بھی سفارتی عملے کو شدید مشکلات کا سامنا ہے۔