گھڑی سکینڈل پر عمران کی بجائے فرح گوگی کا جیو کو نوٹس

توشہ خانہ کا گھڑی سکینڈل بے نقاب کرنے پر شاہزیب خانزادہ اور جیو ٹی وی کے خلاف قانونی کارروائی کا اعلان کرنے والے عمران خان کی بجائے بشریٰ بی بی کی سہیلی فرح گوگی نے میدان میں آتے ہوئے جیو ٹی وی کو 5 ارب روپے ہرجانے کا نوٹس جاری کر دیا یے۔ فرح گوگی نے توشہ خانہ کے تحائف بیچنے کے الزامات پر دبئی میں مقیم کاروباری شخصیت عمر فاروق ظہور، جیو ٹی وی اور اس کے اینکر شاہزیب کو ہرجانے کا قانونی نوٹس بھیجا ہے۔

خیال رہے کہ رواں ماہ کے وسط میں شاہزیب کو انٹرویو دیتے ہوئے دبئی میں مقیم کاروباری شخصیت عمر فاروق ظہور نے الزام لگایا تھا کہ عمران کو سعودی ولی عہد محمد بن سلمان کی جانب سے تحفے میں دی گئی مہنگی گھڑی 20 لاکھ ڈالر میں فرح خان گوگی نے انہیں فروخت کی جس کی مالیت 2019 میں تقریباً 28 کروڑ روپے تھی۔

فرح خان کی جانب سے بھجوائے گئے قانونی نوٹس میں مؤقف اپنایا گیا ہے کہ 2019 میں فرح خان دبئی گئی ہی نہیں، عمر فاروق ظہور نے دیگر افراد کے ساتھ مل کر توشہ خانہ تحائف بیچنے کا جھوٹا الزام لگایا، شہرت اور ساکھ متاثر کرنے کے لیے من گھڑت اور بے بنیاد الزامات لگائے گئے۔ فرح خان کی جانب سے اپنے وکیل کے توسط سے ارسال کیے گئے قانونی نوٹس میں کہا گیا ہے کہ بدنیتی کی بنیاد پر ٹارگٹ کر کے فرح خان کے خلاف پروپیگنڈا کیا گیا۔ فرح خان نے نوٹس میں 7 روز کے اندر دبئی میں مقیم کاروباری شخصیت عمر فاروق ظہور ، نجی چینل جیو ٹی وی اور اور اس کے اینکر شاہزیب خانزادہ سے جھوٹے الزامات لگانے پر غیر مشروط معافی مانگنے کا مطالبہ کیا ہے۔ قانونی نوٹس میں کہا گیا ہے کہ غیر مشروط معافی مانگنے کے ساتھ ساتھ شہرت متاثر کرنے پر 5 ارب روپے بھی ادا کیے جائیں۔

یاد رہے کہ عمر فاروق ظہور نے شاہ زیب خانزادہ کے پروگرام میں دعویٰ کیا تھا کہ مارچ 2019 میں سابق وزیر احتساب شہزاد اکبر نے انہیں کال کر کے کہا کہ ان کے پاس گھڑیوں کا ایک سیٹ ہے اور اگر میں دلچسپی رکھتا ہوں تو میں فرح خان سے رابطہ کروں کیونکہ انہیں مدد کی ضرورت ہے اور ان اثاثوں کے لیے کوئی خریدار نہیں مل رہا ہے۔ عمر فاروق ظہور نے دعویٰ کیا کہ انہوں نے دبئی میں فرح خان سے ملاقات کی جنہوں نے انہیں بتایا کہ یہ گھڑی سعودی شہزادے نے عمران خان کو تحفے میں دی تھی اور وہ عمران خان اور ان کی اہلیہ کی جانب سے یہ چیزیں بیچنا چاہتی ہیں۔

ان کا کہنا تھا کہ پی ٹی آئی اس گھڑی کو 40 سے 50 لاکھ ڈالر میں فروخت کرنا چاہتی تھی لیکن بات چیت کے بعد میں نے اسے 20 لاکھ ڈالر میں خرید لیا اور فرح خان کے اصرار پر ادائیگی نقد میں کی۔ عمر فاروق ظہور نے کہا تھا کہ ’ادائیگی کے فوراً بعد فرح نے شہزاد اکبر کو فون پر بتایا کہ ڈیل ہوگئی ہے اور مجھ سے تعارف کروانے پر ان کا شکریہ ادا کیا، شہزاد اکبر نے بھی توشہ خانہ کے تحائف خریدنے پر میرا شکریہ ادا کیا اور درخواست کی کہ میں اس معاملے پر کسی سے بات نہ کروں اور میں نے حامی بھرلی۔

جیو نیوز پر نشر کیے گئے انٹرویو کے دوران عمر فاروق نے وہ گھڑی بھی دکھائی اور دعویٰ کیا کہ یہ اصلی ہے، انہوں نے معاملے کی تحقیقات کیے جانے کی صورت میں مزید تفصیلات فراہم کرنے کی بھی پیشکش کی تھی۔