کیا ملک میں اب چائے کی پتی کا بحران آنے والا ہے؟

رمضان کی آمد آمد ہے اور اس بات کا اعلان اشیا ضروریہ کی قیمتیں عوام کو منہ چڑھاتے ہوئے کر رہی ہیں، اب چائے کی کھلی پتی بھی عوام کی پہنچ سے دور ہو رہی ہے جس کی قیمت میں صرف 15 روز کے دوران 1100 روپے فی کلو اضافہ ریکارڈ کیا گیا ہے۔کھلی چائے کی پتی کی قیمت گزشتہ 15 روز میں ایک ہزار ایک سو روپے سے بڑھ کر 16 سو روپے فی کلو تک پہنچ گئی ہے کیونکہ دسمبر 2022 کے آخر سے جنوری کے اوائل تک پہنچنے والے 250 کے قریب کنٹینرز اب تک بندرگاہ پر پھنسے ہوئے ہیں۔

21 جنوری کے بعد بینکوں نے مالیاتی انسٹرومنٹ فائل کیے تھے، اس طرح صرف ان درآمد کنندگان کو ڈیوٹی ادا کرنے کی اجازت دی گئی تھی جنہوں نے اپنے سپلائرز سے 180 دن کی ادائیگی مؤخر کر دی تھی، مگر جو لوگ اپنے سپلائرز سے یہ سہولت حاصل کرنے میں ناکام رہے، ان کے کنٹینرز اب بھی بندرگاہ پر پھنسے ہوئے ہیں۔ایک خوردہ فروش نے بتایا کہ ایک معروف برانڈ نے 170 گرام دانے دار اور الائچی پیک کی قیمت 290 روپے سے بڑھا کر 320 اور 350 روپے کر دی ہے، اسی طرح 900 اور 420 گرام والے پیک کی قیمت اب ایک ہزار 350 اور 550 روپے کے مقابلے میں ایک ہزار 480 اور 720 روپے کر دی جبکہ دیگر کمپنیاں بھی اس کی پیروی کرنے کے لیے تیار ہیں۔

فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کی چائے سے متعلق اسٹینڈنگ کمیٹی کے کنوینر ذیشان مقصود نے کہا کہ اس وقت درآمدات بحران کا شکار ہیں جس کی وجہ سے مارچ میں بڑی قلت ہو سکتی ہے، بینکوں کا کہنا ہے کہ انہیں اسٹیٹ بینک آف پاکستان نے 180 دن کے مؤخر کنٹریکٹ یا 180 دن کے لیٹر آف کریڈٹ (ایل سیز) پر دستاویزات جاری کرنے کی ہدایات ہیں۔پاکستان ٹی ایسوسی ایشن (پی ٹی اے) کے ایگزیکٹو رکن ذیشان مقصود نے کہا کہ بینک یہ کہتے ہوئے ایل سی نہیں کھول رہے ہیں کہ ان کے پاس نئے معاہدوں کے لیے اسٹیٹ بینک سے کوئی ہدایات نہیں ملی ہیں، خدشہ ظاہر کیا جارہا ہے کہ اگر پھنسے ہوئے کنسائنمنٹ جاری نہ کیے گئے تو رمضان میں چائے کی قیمت 2500 روپے فی کلو تک پہنچ سکتی ہے۔

اس کے نتیجے میں فلاحی تنظیمیں قلت اور زیادہ قیمت کی وجہ سے راشن کے تھیلوں میں چائے کی پتی تقسیم کرنے کے قابل نہیں ہوسکتیں، انہوں نے تجویز پیش کی کہ پاکستان کو کینیا کے ساتھ ترجیحی تجارتی معاہدے (پی ٹی اے) پر دستخط کرنے چاہئیں، ہم ممباسا میں ہفتہ وار نیلامی سے کینیا کی 90 فیصد چائے درآمد کرتے ہیں جہاں تمام افریقی نژاد چائے فروخت کی جاتی ہیں۔کینیا افریقہ کا گیٹ وے ہے جو خشکی سے گھرے 7 ممالک کو ملاتا ہے، پاکستان کینیا سے سالانہ تقریباً 50 کروڑ ڈالر کی چائے درآمد کرتا ہے اور صرف 25 کروڑ ڈالر کی مختلف اشیا برآمد کرتا ہے اگر پی ٹی اے کا کینیا کے ساتھ معاہدہ ہوتا ہے تو پاکستان کی برآمدات چاول، سرجیکل سامان، ٹیکسٹائل، ٹریکٹر، الیکٹرانکس، آئی ٹی، سیمنٹ اور دیگر بہت سی دیگر اشیا کی ترسیل کے ذریعے سالانہ ڈھائی ارب ڈالر تک بڑھ جائیں گی جو کینیا دیگر ممالک سے درآمد کرتا ہے۔

مالی سال 2023 کے ابتدائی 6 ماہ کے دوران ملک کی چائے کی درآمدات ایک لاکھ 28 ہزار 57 ٹن (31 کروڑ 80 لاکھ ڈالر) رہی جوکہ گزشتہ سال کی اسی مدت میں ایک لاکھ 29 ہزار 693 ٹن (30 کروڑ ڈالر) تھی، موجودہ مالی سال کی ابتدائی ششماہی میں اوسط فی ٹن قیمت 2 ہزار 318 ڈالر کے مقابلے میں 2 ہزار 489 ڈالر رہی۔

گلوکاروں نے 24 گھنٹے کا کنسرٹ کرکے عالمی ریکارڈ بنا ڈالا

Related Articles

Back to top button