کُتے بھی خواب دیکھتے ہیں، جگانا خطرناک ہوسکتا ہے

تحقیق میں ثابت ہوا ہے کہ پالتو کتے بھی سونے کے دوران خواب دیکھتے ہیں۔ لیکن کیا خواب دیکھتے ہیں اس کا جواب شاید ہارورڈ میڈیکل اسکول کی ایک ماہر نفسیات نے ڈھونڈ نکالا ہے۔

ہارورڈ میڈیکل اسکول کی کلینیکل اور ارتقائی ماہر نفسیات ڈاکٹر ڈیرڈری بیرٹ نے ایک مطالعہ شائع کیا ہے جس میں انہوں نے اس بات پر روشنی ڈالی ہے کہ کہ کتے خواب میں کیا دیکھتے ہیں۔ انہوں نے بتایا کہ کتے بھی انسانوں کی طرح ممکنہ طور ہپر اپنے روزمرہ کے تجربات کے بارے میں خواب دیکھتے ہیں۔

انہوں نے بتایا کہ انسان انہی چیزوں کے بارے میں خواب دیکھتے ہیں جو وہ دن بھر تجربہ کرچکے ہوں۔ اور یہ سوچنے کی کوئی وجہ نہیں ہے کہ جانور اس معاملے میں انسانوں سے مختلف ہیں۔ چونکہ کتے عام طور پر اپنے مالکان سے بہت زیادہ قربت رکھتے ہیں، اس لیے یہ ممکن ہے کہ آپ کتا آپ کے چہرے، آپ کی بو اور آپ سے کھیلنے یا آپ کو تنگ کرنے کے بارے میں خواب دیکھ رہا ہو۔

تاہم ماہر نفسیات نے کہا اگرچہ یہ یقینی طور پر نہیں کہا جاسکتا کہ کتا کیا خواب دیکھ رہا ہے لیکن چند علامات سے اندازہ لگایا جاسکتا ہے جیسے اگر وہ دوڑنے کا خواب دیکھ رہے ہوں گے تو ان کے پنجے یا ٹانگیں مُڑنا شروع ہو جائیں گی یا پھر کسی دوسرے کتے یا انسان کے ساتھ بات چیت کررہے ہوں گے تو نیند میں ہی بھونکنا شروع کردیں گے۔

لیکن جب ڈراؤنے خوابوں کی بات آتی ہے تو انسانوں کی طرح ہی کتے بھی ڈراؤنے خواب دیکھ سکتے ہیں۔ امریکن کینل کلب (پالتو کتوں سے متعلق آگاہی فراہم کرنے والا ادارہ) مالکان کو تجویز دیتا ہے کہ سوتے ہوئے کتوں کو نہ جگائیں کیونکہ اگر وہ خوفناک خواب دیکھ رہے تھے تو اُس کے اثر کی وجہ سے وہ آپ پر حملہ کرسکتے ہیں