ہدایت الرحمٰن سمیت حق دو تحریک کے 5 رہنما پولیس کے حوالے

حق دو تحریک کے رہنما مولانا ہدایت الرحمٰن سمیت دیگر پانچ رہنمائوں کو 6 روزہ سفری ریمانڈ پر پولیس کے حوالے کر دیا گیا ہے۔

مولانا ہدایت الرحمٰن کو گوادر کی عدالت میں پیش کیا جائے گا، اُن پر گوادر میں پرتشدد مظاہروں کے دوران ایک پولیس کانسٹیبل کو قتل کرنے کا مقدمہ درج کیا گیا تھا، ان کیخلاف درج 2 مختلف مقدمات میں کوئٹہ پولیس نے انہیں اور 4 دیگر افراد کو حراست میں لے لیا تھا۔

انہیں گوادر پولیس نے عدالت کے احاطے سے گرفتار کرنے کے بعد کوئٹہ منتقل کیا تھا جہاں وہ سرنڈر کرنے آئے تھے، اُن کے وکلا نے گرفتاری کے خلاف احتجاج کرتے ہوئے عدالت کے سامنے سرنڈر کرنے اور عبوری ضمانت کی استدعا مسترد کیے جانے کو غیرقانونی اور بنیادی حق سے انکار قرار دیا۔

سخت سیکیورٹی کے ساتھ مولانا ہدایت الرحمٰن اور دیگر 4 افراد کو گوادر منتقل کر دیا گیا جہاں انہیں مزید کارروائی کے لیے متعلقہ عدالت میں پیش کیا جائے گا۔