پاکستانیوں کی کثیر تعداد امریکی ویزے کے حصول کے لیے کوشش کر رہی ہے، اس حوالے سے امریکی سفارتخانے نے موجودہ درخواستوں کو پاکستان کی تاریخ میں بلند ترین نمبر قرار دیا ہے، ایمبیسی کے مطابق درخواست گزاروں کے لیے اپائنٹمنٹ کے انتظار میں کمی کے لیے اقدامات کیے گئے ہیں۔

ترجمان امریکی سفارتخانہ کے مطابق پاکستان میں امریکی مشن ماضی کی نسبت زیادہ سے زیادہ ویزا درخواستوں کو نمٹانے کے لیے کوشاں ہے۔ ویزا اپائنٹمنٹ کے انتظار کی مدت میں کمی لانے کے لیے سخت محنت کر رہے ہیں۔امریکی سفارتخانہ کے مطابق ویزے کی مانگ میں اضافے کے پیش نظر درخواست گزاروں کی سہولت کیلیے تین طریقوں سے کام کررہے ہیں،اول، نان امیگرنٹ ویزا کیلیے ہزاروں درخواستوں پر عمل درآمد تیزکر دیا گیا ہے۔

دوسری سطح پر سفر کے خواہاں پاکستانیوں کو یہ اضافی رعایت دی گئی ہے کہ وہ اپنی اپائنٹمنٹ منسوخ کرنے کے بعد امریکی قونصل خانہ کراچی یا امریکی سفارتخانے اسلام آباد میں،جو بھی اُن کیلیے مناسب ہو، سے دوبارہ شیڈول کر سکتے ہیں۔اِسی طرح 25 ستمبر سے امریکی قونصل خانہ کراچی میں انٹرویو سے مستثنیٰ ایسے امیدواروں کی درخواستیں قبول کرنے کا سلسلہ شروع کیا جا رہا ہے جنہیں پہلے کراچی سے امریکی ویزا جاری کیا گیا تھا۔

درخواست گزار انٹرویو سے مستثنیٰ ہونے سے متعلق اپنی اہلیت کی جانچ پڑتال کے لیے ہماری ویب سائٹ یو ایس ٹریول ڈاکس ڈاٹ کام سلیش پی کے پررجوع کر سکتے ہیں۔پرنٹ کرنے کے بعد اپائنٹمنٹ کے بغیر ہی کراچی میں اے اِی جی کے ڈراپ باکس میں درخواست سمیت اپنے ضروری کوائف جمع کروا سکتے ہیں۔اسلام آباد میں امریکی سفارتخانہ پہلے ہی استثنیٰ کے اہل ایسے ویزا امیدواروں کی درخواستیں قبول کر رہا ہے جن کو پہلے بھی اسلام آباد

سے ویزا جاری ہوا تھا۔