اداکارہ حرامانی دوران شوٹنگ حقیقی سین کا شکار

کراچی میں شوٹنگ کے دوران اداکارہ حرامانی، ان کے شوہر، اداکار نبیل قریشی سمیت دیگر فنکاروں پر اچانک ایک ہجوم نے حملہ کر دیا، متعدد فنکاروں کو تشدد کا نشانہ بنایا جبکہ موبائل فون اور قیمتی سامان بھی چھین لیا۔دیگر فنکاروں نے اس واقعہ کی مذمت کرتے ہوئے سکیورٹی فورسز سے مطالبہ کیا ہے کہ ذمہ داروں کو گرفتار کر کے قرار واقعہ سزا دی جائے، ورنہ آئندہ یہ سلسلہ چل نکلے گا۔

ہدایت کار اور فلم ساز نبیل قریشی نے 6 فروری کو اپنی ٹوئٹ میں بتایا کہ وہ اپنی ٹیم کے ہمراہ پیر الہٰی بخش (پی آئی بی) کالونی کے علاقے جمشید کوارٹرز میں شوٹنگ میں مصروف تھے کہ ہجوم نے ان پر حملہ کر دیا، ہجوم شوٹنگ کے وقت ایک گھر میں گھس آیا، جہاں موجود درجنوں خواتین و اداکاراؤں کو ہراساں کیا گیا، ان پر تشدد کیا گیا، ان سے موبائل فون اور دیگر سامان سمیت ٹیم ارکان سے آلات بھی چھین لیے۔

نبیل قریشی نے اپنی سلسلہ وار ٹوئٹس میں بتایا کہ حملہ کرنے والا ہجوم جدید ہتھیاروں سے لیس تھا، جنہوں نے خواتین اور بچوں کا بھی لحاظ نہیں کیا اور انہوں نے پہلی بار کراچی میں اس طرح کے مسئلے کا سامنا کیا۔فلم ساز نے ایک اور ٹوئٹ میں بتایا کہ انہوں نے پولیس کو واقعے سے متعلق آگاہ کر دیا اور ساتھ ہی سندھ حکومت، پولیس اور رینجرز سے مطالبہ کیا کہ وہ حملہ کرنے والے ملزمان کو گرفتار کرکے انہیں کڑی سزا دیں تاکہ دوبارہ کسی شوٹنگ ٹیم کے ساتھ ایسا واقعہ پیش نہ آئے۔

اداکار نے واقعے کو انتہائی اذیت ناک قرار دیتے ہوئے کہا کہ واقعے کے بعد جہاں اب تک وہ خود ٹراما کا شکار ہیں، وہیں خواتین، ٹیم کے ارکان اور شوٹنگ سیٹ پر موجود بچے بھی خوفزدہ ہیں اور ان کی پوری ٹیم اذیت ناک تجربے سے گزری۔نبیل قریشی نے اپنی ٹوئٹس میں اداکارہ حرا مانی اور ان کے شوہر مانی کو بھی مینشن کیا اور بعد ازاں انہوں نے بھی اپنی سوشل میڈیا پوسٹس پر واقعے سے متعلق خبر شیئر کی اور خود پر حملے کو انتہائی خوف زدہ قرار دیا۔

اطلاعات ہیں کہ شوٹنگ پر حرا مانی اور ان کے شوہر مانی کے علاوہ سینئر اداکارہ گل رعنا اور اُبھرتی ہوئی اداکارائیں بھی موجود تھیں اور حملے کے بعد زیادہ تر اداکارائیں تاحال خوفزدہ ہیں۔شوٹنگ سیٹ پر حملے اور اداکاروں کو ہراساں کرنے کے واقعے کے بعد جہاں عام افراد نے اس کی مذمت کی، وہیں شوبز شخصیات نے بھی اس پر اظہار افسوس کرتے ہوئے سندھ حکومت اور پولیس سے ملزمان کو جلد سے جلد گرفتار کرنے کا مطالبہ کردیا۔

اداکارہ ماہرہ خان نے شوٹنگ پر حملے کو انتہائی خطرناک قرار دیتے ہوئے اپنی ٹوئٹ میں لکھا کہ انہیں یقین نہیں آ رہا کہ ایسا ہوا ہے، ساتھ ہی انہوں نے سوالات اٹھائے کہ اس حملے کے ذمہ داران کون ہیں اور حادثہ ہوجانے کے بعد کون جواب دہ ہے؟ اداکار عثمان خالد بٹ نے بھی واقعے کی مذمت کرتے ہوئے تمام ساتھی فنکاروں کی خیریت کے لیے دعا بھی کی۔خالد عثمان بٹ نے سندھ حکومت اور پولیس سے ملزمان کو جلد گرفتار کرنے کا مطالبہ بھی کیا، فلم ساز انیر نے بھی شوٹنگ ٹیم اور اداکاروں پر ہونے والے حملے کو افسوس ناک قرار دیتے ہوئے ان کی خیریت کےلیےدعائیں کیں۔