بھارتی گلوکار دلیر مہندی کو 2 سال قید کی سزا کیوں ہوئی؟

اپنے گانے کے مخصوص انداز سے مداحوں کے دلوں میں گھر کرنے والے بھارتی پنجاب کے مقبول گلوکار دلیر مہندی کو انسانی سمگلنگ کیس میں پٹیالہ کی ضلعی عدالت نے دو سال قید کی سزا سنا دی ہے۔

بھارتی گلوکار کی جانب سے سزا کے خلاف اپیل کو مسترد کر دیا گیا ہے، پٹیالہ کی ضلعی عدالت میں دلیر مہندی اور ان کے بھائی نے لوگوں سے پیسہ لے کر انہیں غیر قانونی طور پر باہر بھیجنے کے کیس میں دو سال قید کی سزا کے خلاف اپیل کی تھی۔

ایڈیشنل ڈسٹرکٹ اینڈ سیشن جج ایچ ایس گریوال نے دلیر مہندی کی اپیل مسترد کر دی، عدالت نے دلیر مہندی کی ضمانت اور پروبیشن پر رہائی کی درخواست بھی مسترد کر دی ہے۔

اپیل اور ضمانت کی درخواستیں مسترد ہونے کے بعد پولیس نے دلیر مہندی کو احاطہ عدالت سے حراست میں لے لیا، خیال رہے کہ 2018 میں انڈیا کی ایک عدالت نے دلیر مہندی کو انسانی سمگلنگ کے الزام میں دو سال قید کی سزا سنائی تھی۔ عدالت کا کہنا ہے کہ ’دلیر مہندی اور ان کے بھائی شمشیر سنگھ 1998 اور 1999 میں بھاری رقم کے بدلے 10 افراد کو اپنے کنسرٹ کی آڑ میں امریکہ لے کر گئے جو واپس انڈیا نہیں لوٹے، دلیر مہندی اور ان کے بھائی پر یہ کیس 2003 میں بنایا گیا تھا جس کا فیصلہ 2018 میں ہوا تھا۔

یاد رہے کہ پنجاب پولیس نے گلوکار دلیر مہندی، ان کے بھائی شمشیر سنگھ اور تین دیگر افراد کے خلاف مقدمہ درج کیا تھا۔ ان پر الزام ہے کہ انہوں نے لوگوں کو موسیقی کے طائفوں میں شامل کرکے انہیں باہر بھیجنے کے بہانے لاکھوں روپے ہتھیائے ہیں۔

پولیس نےدلیر مہندی کے بڑے بھائی شمشیر سنگھ کو بھی حراست میں لے لیا تھا۔ دلیر مہدی کے بھائی کے خلاف شکایات تھیں کہ انہوں نے مغربی ممالک بھیجنے کا جھانسہ دے کر کئی افراد کو دھوکا دیا ہے اور ان سے بڑی بڑی رقوم بٹوری ہیں۔ دلیر مہدی نے اس الزام کی تردید کی تھی اور کہا تھا کہ کافی عرصے پہلے ان کا اپنے بھائی سے تعلق ٹوٹ چکا ہے۔ تاہم بھارتی عدالت نے ان الزامات کی تصدیق کرتے ہوئے دلیر مہندی کو دو سال قید کی سزا سنا دی ہے۔