شاہ رخ کی قیمتی گھڑی نے مداحوں کے ہوش کیوں اُڑا دیئے

فلمی دنیا کے چوتھے امیر ترین اداکار شاہ رخ خان جہاں اپنی لاجواب اداکاری کی وجہ سے دنیا بھر میں پہچان رکھتے ہیں وہاں انہیں قیمتی لباس اور قیمتی گھڑیاں زیب تن کرنے کا شوق بھی دیگر فنکاروں سے منفرد بناتا ہے۔

بالی ووڈ کنگ خان کے مداحوں کے لیے یہ حیران کن ہوگا کہ وہ مہنگی ترین گھڑی پہننے کا شوق رکھتے ہیں، ان دنوں اداکار اپنی فلم ’پٹھان‘ کی کامیابی کے بعد ہونے والے مختلف ایونٹس میں شرکت کررہے ہیں۔

یہاں یہ بات بھی قابل ذکر ہے کہ ورلڈ آف اسٹیٹکس کی جانب سے دنیا کے 8 امیر ترین اداکاروں کی فہرست جاری کی گئی تھی جس کے مطابق شاہ رخ خان فہرست میں چوتھے نمبر پر ہیں۔

تاہم حال ہی میں ایک پریس کانفرنس میں انہوں نے نیلے رنگ کی گھڑی پہن رکھی ہے جس کے بارے میں مداح تبصرہ کرتے دکھائی دے رہے ہیں، ٹوئٹر صارفین کا کہنا ہے کہ شاہ رخ خان کی گھڑی کی قیمت بہت سے لوگوں کی پوری زندگی کی آمدن سے بھی زیادہ ہے۔

بھارتی میگزین انڈیا ٹوڈے کے مطابق گھڑی کی قیمت 4 کروڑ 98 لاکھ بھارتی روپے زائد ہے جو 16 کروڑ پاکستان روپے سے بھی زیادہ بنتی ہے۔یہ نیلے رنگ کی گھڑی معروف برانڈ(Audemars Piguet) کی ہے۔

خیال رہے کہ بالی وڈ کے بادشاہ شاہ رخ خان کی فلم ’پٹھان‘ ریلیز کے ابتدائی تین ہفتوں میں ریکارڈ 850 کروڑ روپے کمائی کرکے رواں سال کی سب سے زیادہ کمائی کرنے والی پانچویں عالمی فلم بھی بن گئی ہے۔

’پٹھان‘ کو بھارت سمیت دنیا بھر کی 8 ہزار سینما اسکرینز پر 25 جنوری کو ریلیز کیا گیا تھا اور یہ پہلی بھارتی فلم بنی تھی، جسے اتنی زیادہ اسکرینز پر پیش کیا گیا تھا۔