’’صبور علی شادی کے لمحات دیکھ کر غصہ میں کیوں آگئیں‘‘

اداکارہ صبور علی نے اپنی شادی کے یادگار لمحات ڈرامہ سیریل میں کاپی کیے جانے کا الزام عائد کرتے ہوئے کہا کہ اداکارہ کا نکاح رواں سال جنوری میں اداکار علی انصاری سے ہوا، شادی کی تقریبات کا آغاز 3 جنوری سے ہوا تھا اور دونوں کے مایوں کی تقریبات 5 جبکہ مہندی کی تقریبات 6 جنوری کو ہوئی تھیں۔نکاح کی تقریب میں صبور علی نے روایتی سفید اور گولڈ جیولری پہن رکھی تھی اور اپنی والدہ کی شادی جیسا لباس کا انتخاب کیا، اداکارہ نے اپنی مرحوم والدہ کو خراج عقیدت پیش کرنے کیلئے ڈیزائنر فائزہ ثقلین کی طرف سے تیار کردہ کامدانی لباس زیب تن کیا تھا، نکاح کیلئے سٹیج سفید رنگ کے پھولوں سے سجایا گیا تاہم اب جیو ٹی وی پر نشر ہونے والے ڈراما سیریل ’’منت مراد‘‘ کی کی قسط میں منت کا کردار ادا کرنی والی اقرا عزیز اور مراد کا کردار ادا کرنے والے طلحہ کی شادی ہوئی تھی۔ڈرامے میں دونوں کرداروں کی شادی کی تقریب اداکارہ صبور علی کی حقیقی شادی سے ملتی جلتی نظر آئی، ڈرامے میں نکاح کیلئے سٹیج کی سجاوٹ بھی ویسے ہی کی گئی جیسے صبور علی کی حقیقی شادی میں کی گئی، اس کے علاوہ صبور علی کی حقیقی شادی کی جیولری اور ڈرامے میں اقرا عزیز کی جیولری بھی کافی ملتی جلتی دکھائی دی، یہی نہیں بلکہ اقرا عزیز اور صبور علی کے جوڑے کا رنگ بھی ایک جیسا ہے، یہ دیکھ کر صبور علی غصہ ہوگئیں اور ڈرامے کی پروڈکشن ٹیم پر الزام عائد کیا کہ انہوں نے اداکارہ کی اجازت کے بغیر ان کی حقیقی شادی کے یادگار لمحے کو کاپی کیا ہے۔صبور علی نے انسٹاگرام سٹوری پر لکھا کہ اب میں یہ دیکھ کر کیسا محسوس کروں؟ میرے یادگار لمحات، میری یادیں، میرے جذبات، میرا وژن اور میری زندگی کے سب سے خاص دن کے لیے میرا لباس اور جیولری سے کے میک اپ تک سب کچھ ڈرامے میں کاپی کیا گیا ہے۔اداکارہ کی جانب سے لگائے گئے الزام پر سوشل میڈیا صارفین نے کہا کہ ’صبور علی کو خوش ہونا چاہئے کوئی ان کی شادی کے لُک اور سجاوٹ سے متاثر ہے، دنیا میں اور بھی بڑے مسئلے ہیں، ایک اور صارف نے لکھا کہ اس طرح ہر پاکستانی دُلہن تیار ہوتی ہے، اس میں کوئی نئی بات نہیں اور اگر انہوں نے کاپی کر بھی لیا تو اس میں غصہ ہونے والی کیا بات ہے، انہیں خوش ہونا چاہئے۔