صحیفہ جبار نے نامور شخصیات کو تنقید کا نشانہ کیوں بنایا؟

معروف اداکارہ صحیفہ جبار نے سوشل میڈیا انفلونسرز اور مشہور شخصیات کو تنقید کا نشانہ بناتے ہوئے کہا کہ جب وہ اپنے مداحوں کے ساتھ خوشیوں کے لمحات شیئر کرتے ہیں تو اس کے ساتھ زندگی میں آنے والی مشکلات، لڑائی جھگڑوں، میاں بیوی میں ناچاقی جیسے امور سے بھی نوجوانوں کو آگاہ کرنا چاہئے تاکہ وہ سیکھ سکیں۔ماڈل صحیفہ جبار خٹک نے انسٹاگرام پر سوشل میڈیا انفلونسرز اور مشہور شخصیات کو مخاطب کرتے ہوئے طویل پوسٹ کی، انہوں نے ساتھی اداکاروں اور انفلونسرز پر زور دیتے ہوئے کہا کہ وہ اپنے فالوورز کو شادی جیسے نازک رشتے کے بارے میں غلط تصویر پیش کر رہے ہیں، اس رشتے میں رہ کر کن چیلنجز اور مشکلات کا سامنا کرنا پڑتا ہے اس پر کوئی بات نہیں کرتا۔انہوں نے ساتھی اداکاروں اور نامور شخصیات کو مشورہ دیا کہ کیمرا کے سامنے بیٹھ کر اپنے نوجوان فالوورز کو شادی کے رشتے میں آنے والے چیلنجز کے بارے میں وہ باتیں بتائیں جو والدین انہیں بتانا بھول جاتے ہیں، جب آپ سوشل میڈیا پر اپنی شادی، برائڈل شاور، بے بی شاور، ہنی مون اور دیگر خوشگوار لمحات شئیر کرتے ہیں تو مداحوں کو یہ بتانا ضروری ہے کہ آپ نے اس رشتے میں رہ کر کن چیلنجز کا سامنا کیا’۔صحیفہ جبار نے ناپسندیدگی کا اظہار کرتے ہوئے کہا کہ انہیں بالکل پسند نہیں کہ جب اداکار اور انفلونسرز سوشل میڈیا پر اپنے جیون ساتھی کے ساتھ صرف خوشگوار لمحات شئیر کرتے ہیں لیکن اُسی جیون ساتھی کے ساتھ گزرے مشکل لمحات پر بات نہیں کرتے یا جب جوڑے کے آپس میں معاملات ٹھیک نہیں چل رہے ہوتے، ہر جوڑے کے درمیان کئی بار علیحدگی پر بات چیت ہوتی ہے لیکن اس کے باوجود وہ ایک ساتھ زندگی گزارنے کا فیصلہ کرلیتے ہیں، اپنے رشتے کو مزید ایک اور موقع دیتے ہیں اور رشتہ نبھانے میں کامیاب بھی ہوجاتے ہیں، آج کل ایک طرف جہاں جوڑوں میں طلاقیں عام ہو رہی ہیں ہمیں اس کی بنیادی وجوہات پر بھی بات کرنی چاہئے۔انہوں نے کہا کہ وہ خراب اور تشدد پر مبنی تعلقات کے خلاف ہیں، وہ اس بات پر بھی یقین رکھتی ہیں کہ انسان کو کسی بھی رشتے پر اپنے خواب، عزائم، عزت نفس اور ذہنی حالت پر سمجھوتہ نہیں کرنا چاہئے لیکن ہر ایک کو یہ احساس ہونا چاہئے کہ کئی لوگوں کے لیے رشتہ ختم کرنا بہت آسان ہوگیا ہے، کسی بھی انسان کو چھوٹی چھوٹی باتوں پر رشتہ ختم نہیں کرنا چاہئے۔ماڈل نے اداکاروں اور انفلونسرز پر زور دیتے ہوئے کہا کہ وہ اپنے فالوورز سے سچ بولیں، نوجوان نسل کو مشکلات کے بارے میں بھی آگاہ کریں، انہیں بتائیں کہ کالج چھوڑنا صحیح نہیں ہے، انفلوسرز بنا کر عارضی طور پر پیسہ کمانا مستقل کیرئیر کا راستہ نہیں ہے۔صحیفہ جبار نے زور دیتے ہوئے کہا کہ پلیز اپنے غیر ملکی دوروں کی تصاویر پوسٹ کرنا بند کریں، فالوورز کو بتائیں کہ آپ نے کتنی محنت کے ساتھ سب کچھ حاصل کیا ہے، نوجوان نسل کو چیلنجز بتائے بغیر محنت کا پھل مت دکھائیں۔

Related Articles

Back to top button