فاران طاہر کی فلم ’’آئی ول میٹ یو ڈئیر‘‘ پر پابندی لگ گئی

محبت، رواداری اور احترام پر مبنی فلم ’’آئی ول میٹ یو ڈئیر‘‘ کی پاکستان میں ریلیز پر پابندی لگنے کے بعد اس میں امریکی پولیس آفیسر کا کردار ادا کرنے والے ہالی ووڈ اداکار فاران طاہر نے سینسر بورڈ سے ناراضگی کا اظہار کرتے ہوئے کہا کہ یہ انتہائی غلط فیصلہ ہے چونکہ فلم میں کوئی نا مناسب بات نہیں ہے۔
’’آئی ول میٹ یو ڈئیر‘‘کو پاکستان میں گزشتہ ماہ 11 مارچ کو ریلیز کیا جانا تھا مگر سینٹرل بورڈ آف فلم سینسر نے فلم میں مسلمانوں کو غلط انداز میں دکھانے کی وجہ سے اس پر پابندی عائد کر دی، اس وقت فلم کی پروڈیوسر ارم پروین بلال نے شوبز ویب سائٹ ورائٹی سے بات کرتے ہوئے اپنی فلم کی پاکستان میں نمائش کی پابندی پر افسوس کا اظہار کیا تھا۔
فلم پر پاکستان میں پابندی عائد کیے جانے پر اس وقت فاران طاہر نے اپنی پوسٹ میں لکھا کہ ان کی فلم ہمارے بنیادی اقدار کو بدنام نہیں کرتی بلکہ ہمارے مسائل پر بحث کی حوصلہ افزائی کرتی ہے۔ فاران طاہر نے لکھا کہ ’فلم کا پیغام محبت، افہام و تفہیم، رواداری اور احترام کو تلاش کرنا ہے، فلم میں ان اقدار پر بحث کو دکھایا گیا ہے جو ہمارے خالق نے ہمارے لیے طے کیے ہیں، ہالی ووڈ اداکار نے تسلیم کیا کہ فلم کا بعض مواد تخلیقیت کی وجہ سے حدود سے گزر جاتا ہے مگر اسے بنیاد بنانے کے بجائے اسے نظر انداز کیا جا سکتا تھا۔
ہالی ووڈ اداکار نے فلم پر پابندی کو مایوس کن اور افسوس ناک قرار دیا اور لکھا کہ پاکستان میں صرف 250 سینما ہیں، جس کا مطلب یہ ہے کہ فلم کو پیسے کمانے کے لیے وہاں پیش نہیں کیا جا رہا تھا بلکہ لوگوں کو اپنے مسائل کے حوالے سے معلومات کے لیے اسے وہاں ریلیز کیا جا رہا تھا۔ فاران طاہر کے مطابق ان کا مقصد ساتھی اداکاروں، ہدایت کاروں اور لکھاریوں کو پاکستانیوں کے ساتھ یومیہ بنیادوں پر بیرون ممالک میں پیش آنے والے مسئلے پر بنی فلم کو دکھا کر انہیں احساس دلانا تھا کہ ایسے مواد بھی تیار کیے جا سکتے ہیں، فاران طاہر کی فلم ’آئی ول میٹ یو ڈیئر‘ میں ان کے علاہ سینئر اداکار قوی خان، نکیتا تیوانی اور شان پارسنز سمیت دیگر اداکار شامل تھے۔ فلم میں پاکستانی اور بھارتی نژاد اداکاروں کے علاوہ امریکی اداکاروں کو بھی کاسٹ کیا گیا تھا اور اس کی کہانی امریکا میں مقیم ایک پاکستانی نژاد خاندان کے گرد گھومتی ہے، فلم میں فاران طاہر نے پاکستانی نژاد امریکی پولیس افسر کا کردار ادا کیا ہے، جن کی جواں سالہ بیٹی پیدائش اور پرورش امریکا میں ہونے کی وجہ سے دیسی روایات سے دور ہوتی ہیں۔ فلم کی کہانی اس وقت اہم بن جاتی ہے جبکہ قوی خان جنہوں نے فلم میں فاران طاہر کے والد کا کردار ادا کیا ہے، پاکستان سے امریکا پہنچتے ہیں اور پھر خاندان میں مسلم اور مشرقی روایات پر بحث شروع ہوتی ہے۔