کومل رضوی کی شادی ناکامی کا شکار کیوں ہوئی؟
ماضی کی مقبول اداکارہ کومل رضوی نے انکشاف کیا ہے کہ شادی کے بعد ان کی زندگی بہت دردناک انداز میں گزری، وہ چار سال تک نہ چاہتے ہوئے بھی ذہنی بیمار شخص کا تشدد برداشت کرتی رہی ہیں جس پر انہیں افسوس ہے۔کومل رضوی نے حال ہی میں نادر علی پوڈ کاسٹ میں شرکت کی، جہاں انہوں نے شوبز سمیت پہلی بار اپنی ماضی کی ازدواجی زندگی پر بھی کھل کر بات کی۔ اداکارہ کی شادی انتہائی کم عمری میں ہوئی تھی اور اس وقت وہ بمشکل 21 برس کی تھیں، جبکہ شادی کے بعد وہ متحدہ عرب امارات (یو اے ای) اور بعد ازاں عمان منتقل ہو گئی تھیں۔
اداکارہ نے واضح کیا کہ پسند کی شادی نہیں کی تھی بلکہ خاندان کی مرضی سے ایک کاروباری شخص سے شادی کی تھی جو ذہنی طور پر بیمار شخص تھے اور انہیں خود مختار خواتین کو مٹھی میں بند کرنے یا غلام رکھنے کا شوق تھا۔کومل رضوی کے مطابق شادی کے وقت وہ اتنی کم عمر تھیں کہ انہیں اپنے ساتھ ہونے والے معاملات ہی سمجھ نہیں آ رہے تھے اور ان کے شوہر اس وقت ان کے ساتھ دماغی جنگ لڑ رہے تھے، ان کے شوہر ان پر غصہ یا تشدد کرنے سے قبل انہیں بتاتے کہ انہوں نے فلاں غلطی کی، جس وجہ سے انہوں نے ان پر تشدد کیا۔
ماڈل و اداکارہ کا کہنا تھا کہ شوہر کی جانب سے بار بار غلطی کا احساس دلائے جانے پر وہ بھی سمجھتی رہیں کہ شاید ان کی ہی غلطی ہے لیکن درحقیقت ایسا نہیں تھا بلکہ ان کے شوہر دماغی طور پر بیمار شخص تھے اگر وہ شوہر کو کبھی ٹھنڈا کھانا پیش کرتیں تو انہیں وہ فرائی پان دے مارتے اور شوہر کی جانب سے جسمانی تشدد کیے جانے کے بعد ہی انہوں نے طلاق لینے کا فیصلہ کیا، وہ شوہر کے جسمانی تشدد سے اتنا تنگ آ گئی تھیں کہ ایک بار انہوں نے وہاں مدد کے لیے پولیس کو بلایا مگر پولیس والوں نے معاملہ دریافت کرنے کے بعد ان کے مسئلے کو گھریلو قرار دے کر اپنی جان چھڑائی اور انہیں تشدد کے لیے وہیں چھوڑ دیا۔
کومل رضوی کے مطابق اگر شوہروں کی جانب سے تشدد کے حوالے سے مناسب تربیت دی جاتی تو وہ شادی کے 6 ماہ کے اندر ہی طلاق لے لیتیں اور مزید ساڑھے تین سال تک تشدد برداشت نہ کرتیں مگر افسوس انہیں اس طرح کی کوئی سمجھ نہیں تھی اور نہ ہی انہیں کسی نے سمجھایا تھا کہ شوہر جب تشدد کرے تو اس کے خلاف اٹھ کھڑی ہوں۔کومل رضوی نے کہا کہ جدید دور میں والدین اپنی لڑکیوں کو سمجھائیں کہ شوہروں کا تشدد برداشت نہیں کرنا چاہئے اور لڑکیوں کو شادی کے بعد ہونے والے مسائل سے متعلق تربیت دی جانی چاہئے، کومل رضوی نے 1996 کے مقبول گانے ’باؤجی باؤجی‘ سے شہرت حاصل کی، ساتھ ہی ان کے اس وقت کے مقبول ڈرامے ’ہوائیں‘ میں ان کے کردار کو کافی سراہا گیا، جس وجہ سے ان کی مقبولیت میں اور اضافہ ہوا۔
اداکارہ نے انتہائی کم عمری میں کیریئر کا آغاز کیا اور اب تک وہ متعدد ڈراموں میں کام کر چکی ہیں جبکہ وہ ٹی وی پر میزبانی بھی کر چکی ہیں، کوک سٹوڈیو میں بھی اپنی آواز کا جادو جگا چکی ہیں، انھوں نے 2012 کے بعد شادی کی تھی، جس کے بعد وہ عمان منتقل ہوگئی تھیں، تاہم 2019 میں ان کی شادی طلاق پر ختم ہوئی تھی۔
