کیا فوجی وردی پہن کر لڑکی کی اہمیت بڑھ جاتی ہے؟

کیا فوجی وردی پہننے کے بعد کسی لڑکی کی معاشرے میں اہمیت بڑھ جاتی ہے؟ یہ وہ سوال ہے جو معروف ڈرامہ سیریل صنف آہن کی وجہ سے سوشل میڈیا پر گردش میں ہے۔ پاکستانی آرمی کی تربیت اور بھرتی کے مراحل پر مبنی ڈرامہ سیریل ’’صنف آہن‘‘ مسلسل اپنے مداحوں کی توجہ حاصل کیے ہوئے ہے۔ یاد رہے کہ ’’صنف آہن‘‘ کو گزشتہ برس سے نجی ٹی وی پر نشر کیا جا رہا ہے اور اب تک اس کی ڈیڑھ درجن سے زائد قسطیں دکھائی جا چکی ہیں، حال ہی میں اس کی 19 ویں قسط نشر کی گئی، جس کے ایک سین کی کلپ وائرل ہونے کے بعد ڈرامے کے اداکاروں کی تعریفیں کی جا رہی ہیں۔
ڈرامے کی وائرل ہونے والی کلپ میں سائرہ یوسف کو اپنے سابق بوائے فرینڈ کو بلا کر ان سے موبائل مانگتے ہوئے دکھایا گیا ہے، سین میں دکھایا گیا ہے کہ سائرہ یوسف فوج میں جانے کے بعد بوائے فرینڈ کی جانب سے تصویر وائرل کیے جانے پر ان سے تعلقات ختم کر دیتی ہیں اور ان سے موبائل مانگتی ہیں، تاکہ وہ اس میں موجود اپنی تمام تصاویر ڈیلیٹ کر دیں۔
منظر میں سائرہ یوسف اپنے بوائے فرینڈ کو بتاتی سنائی دیتی ہیں کہ فوج میں جانے اور وردی پہننے کے بعد وہ اب پہلے جیسی غیر اہم نہیں رہیں، سین میں دکھایا گیا ہے کہ سائرہ یوسف کے ایسے رویے پر ان کے بوائے فرینڈ ان کے ساتھ نامناسب لہجے میں بات کرتے ہوئے انہیں یاد دلاتے ہیں کہ فوجی وردی پہننے سے وہ ایم نہیں ہو گئیں اور وہ ان کے لیے ویسی ہی ہیں، اس کے بعد انکا بوائے فرینڈ انہیں موبائل دینے سے انکار کرنے کے اٹھ کر چلا جاتا یے۔
وائرل ہونے والے سین کے مطابق بوائے فرینڈ کی جانب سے موبائل فون نہ دیئے جانے کے بعد اچانک وہاں شہریار منور آ جاتے ہیں جو کہ ڈرامے میں کپتان کا کردار ادا کر رہے ہیں، سین میں دکھایا گیا ہے کہ شہریار منور کے سخت لہجے اور سمجھانے کے بعد سائرہ یوسف کے سابق بوائے فرینڈ خوف زدہ ہوجاتے ہیں اور شہریار کو اپنا موبائل بھی دے دیتے ہیں، ڈرامے کے سین میں بوائے فرینڈ کی بلیک میلنگ، اس کے نامناسب رویے، سائرہ یوسف کی جانب سے فوجی وردی پہننے کے بعد اپنی اہمیت تبدیل ہو جانے اور شہریار منور کی جانب سے دبنگ اور ذمہ دارانہ انداز کو دکھانے پر اداکاروں کی تعریفیں کی جا رہی ہیں۔
متعدد سوشل میڈیا صارفین نے سائرہ یوسف اور شہریار منور کی تصاویر شیئر کرتے ہوئے دونوں کی اداکاری کو سراہا اور لکھا کہ ایسے ہی مناظر اور مواد کو پاکستانی ٹی وی پر دکھانے کی ضرورت ہے جہاں لوگوں نے شہریار منور کی اداکاری کو سراہا، وہیں بعض لوگوں نے سائرہ یوسف کے بوائے کے کردار نوروز کی حالت پر بھی افسوس کا اظہار کیا۔