15 برس کے انتظار کے بعد ہالی ووڈ فلم ’’اوتار 2 ‘‘ تیار


خیالی دنیا پر مبنی ہالی ووڈ فلم ’’اوتار‘‘ کے مداحوں کا طویل اتنظار آخر اختتام کو پہنچ گیا ہے، ’’اوتار‘‘ سیریز کی دوسری فلم ’’اوتار 2‘‘ کا پہلا ٹیزر ڈیڑھ دہائی کے بعد ریلیز کر دیا گیا ہے، فلم ساز جیمز کیمرون کے مطابق فلم کو رواں برس دسمبر میں ریلیز کیا جائے گا۔
’اوتار: دی وے آف واٹر‘ کا مختصر دورانیے کا ٹیزر 9 مئی کو جاری کیا گیا، جس میں فلم کے مرکزی کرداروں کی جھلک دکھائی گئی، ٹیزر سے فلم کی کہانی کو سمجھنا مشکل ہے، تاہم عندیہ ملتا ہے کہ اس بار پہلی فلم کے کردار اپنے خاندان کو بچانے کی جدوجہد کرتے دکھائی دیں گے، مختصر ٹیزر میں فلم کے کرداروں کو زیر آب زندگی گزارتے اور سمندری حیات پر سواری کرتے دکھایا گیا ہے۔
فلم میں فنٹیسی دنیا اور جنگلات سمیت سمندروں کی ایک ایسی دنیا کی جھلک دکھائی گئی ہے، جس کا سحر شائقین کو جکڑ لیتا ہے، مختصر ٹیزر میں تصدیق کی گئی ہے کہ ’’اوتار دی وے آف واٹر‘‘ کو رواں برس دسمبر میں ریلیز کیا جائے گا۔
سیریز کی دوسری فلم میں پہلی فلم کے تمام کرداروں کے علاوہ مزید نئے کردار بھی شامل کیے گئے ہیں اور نئی فلم میں کیٹ ونسلیٹ، سام ورتھنگٹن، زوئی سلڈانا، گیووانی ریبیس اور سیگورنی ویور بھی مختلف کردار ادا کرتے دکھائی دیں گے۔
فلم کو پہلے 2020 میں ریلیز کرنے کا اعلان کیا گیا تھا مگر کرونا کی وبا آنے کے بعد اس کی ریلیز موخر کر دی گئی تھی، فلم کی شوٹنگ کئی سال تک یورپ، افریقہ اور نیوزی لینڈ سمیت دنیا کے دیگر خطوں میں جاری رہی اور اس میں بھی جیمز کیمرون نے پہلی فلم کی طرح جدید اور انوکھی ٹیکنالوجی کا استعمال کیا ہے۔
سیریز کی دوسری فلم کے بعد سیریز کی تیسری فلم بھی چند سال بعد ریلیز کی جائے گی، کیوںکہ فلم ساز پہلے ہی ’اوتار‘ کو ٹرائلوجی سیریز میں بنانے کا اعلان کر چکے ہیں۔
جیمز کیمرون نے 2018 میں ایک انٹرویو میں بتایا تھا کہ ’اوتار‘ سیریز کو ٹرائلوجی کی صورت میں بنایا جائے گا، جس کے لیے پہلی ٹرائلوجی میں کم سے کم 5 فلمیں بنائی جائیں گی، ’اوتار‘ کی پہلی ٹرائلوجی 5 فلموں پر مشتمل ہوگی، جس کے لیے اس فلم کے 4 سیکوئل بنائے جائیں گے اور پہلی فلم ٹرائلوجی کا آغاز ہوگی۔
جیمز کیمرون نے وضاحت کی تھی کہ ’اوتار‘ کے سیکوئل کی کہانی پہلی فلم سے مختلف ہوگی اور اب اس سیریز کی فلمیں ایک خاندان کی طرح آگے بڑھیں گی، فلم ساز نے بتایا تھا کہ ’اوتار‘ کی پہلی ٹرائلوجی کے لیے مزید 4 سیکوئل بنائے جائیں گے، اور ہر فلم کی کہانی وہیں سے شروع ہوگی جہاں پہلی فلم کی کہانی ختم ہوگی۔
سیکوئل فلم کے بعد ’اوتار تھری‘ کو 2024 جبکہ ’اوتار 4‘ کو 2026 اور ’اوتار 5‘ کو 2028 تک ریلیز کیے جانے کا امکان ہے، جیمز کیمرون نے ’اوتار‘ کو 2009 میں ریلیز کیا تھا، جس نے دنیا بھر میں کمائی کے نئے ریکارڈز بناتے ہوئے ان کی 1999 کی فلم ’ٹائی ٹینک‘ کو کمائی میں پیچھے چھوڑ دیا تھا۔
’اوتار‘ ایک دہائی تک یعنی 2019 تک دنیا کی ہر وقت کی سب سے زیادہ کمائی کرنے والی فلم رہی تھی مگر اس کے بعد اس کی کمائی کا ریکارڈ ’اوینجرز اینڈ گیم‘ نے توڑا تھا،

Related Articles

Back to top button