ماہرہ خان کے سابق شوہر ان پر کسی وجہ سے فخر کرتے ہیں؟

پاکستان اور بھارت میں اپنی اداکاری کا لوہا منوانے والی معروف اداکارہ ماہرہ خان نے انکشاف کیا ہے کہ ان کے کامیاب اداکارہ بننے پر سب سے زیادہ فخر ان کے سابق شوہر کو ہے۔ ماہرہ خان نے حال ہی میں نجی ٹی وی کے پروگرام میں ساتھی اداکار فہد مصطفیٰ کے ساتھ شرکت کی، جہاں اپنی ذاتی زندگی سے متعلق پہلی بار کھل کر باتیں کیں۔ انہوں نے بتایا کہ ان کی پیدائش کراچی میں ہوئی اور او لیول تک تعلیم بھی یہیں حاصل کی، جس کے بعد وہ اپنے چھوٹے بھائی کے ہمراہ اعلیٰ تعلیم کے لیے امریکا گئیں مگر وہاں جاکر مختلف ملازمتیں کرنا شروع کر دیں۔

اداکارہ کے مطابق زندگی کی پہلی ملازمت 16 برس کی عمر میں فارمیسی پر کی اور ملازمت کے دوران پوچے تک بھی لگائے، انہوں نے فلم فیسٹیولز اور شوبز کے دیگر پروگراموں میں شرکت کر کے وہاں بطور والنٹیئر بھی کام کیا، کیونکہ انہیں بچپن سے ہی اداکاری کا شوق تھا۔

اداکارہ نے بتایا کہ بعد ازاں وہ گرمیوں کی چھٹیوں میں پاکستان آئیں تو بطور ریڈیو وی جے کام کا آغاز کیا۔ انہیں اس کام میں مزہ آیا اور پھر وہ امریکا جانے کے بجائے پاکستان میں ہی رہ گئیں اور پھر محبت کی شادی کرلی۔

ماہرہ خان کا کہنا تھا کہ شادی کے بعد انہیں متعدد ڈراموں میں کام کرنے کی پیش کش ہوئی، تاہم جب ایک ڈرامے میں کام کرنے کی حامی بھری اور شوٹنگ کے لیے کراچی سے باہر جانے کے لیے تیار تھیں تو انہیں معلوم ہوا کہ وہ حمل سے ہیں۔ ماہرہ نے بتایا کہ حمل کا علم ہونے کے بعد انہوں نے شوٹنگ پر جانا مناسب نہیں سمجھا۔ پھر انکےبیٹے اذلان کی پیدائش کے تین دن بعد انہیں فلم ساز شعیب منصور نے فون کر کے فلم ’بول‘ میں کام کرنے کی پیش کش کی۔

اداکارہ نے بتایا کہ انکی پہلی فلم ’بول‘ تھی جس سے انہوں نے بطور اداکارہ کیریئر کا آغاز کیا، تاہم انہیں شہرت ٹی وی سے ملی اور سب سے زیادہ مقبولیت ’ہم سفر‘ ڈرامے سے ملی۔

ایک سوال کے جواب میں اداکارہ نے بتایا کہ وہ اپنے خاندان کی پہلی لڑکی ہیں جو شوبز میں آئیں، ان سے قبل ان کے خاندان کے تمام لوگ بینکنگ اور تعلیم کے شعبے سے وابستہ رہے ہیں، اگرچہ انہیں تھوڑی سے مشکلات ہوئیں، تاہم اداکارہ بننے کے بعد ان کے اہل خانہ کو ان پر فخر ہے۔ ماہرہ خان نے بتایا کہ اس میں کوئی شک نہیں کہ ان کے والدین اور بھائیوں کو بھی فخر ہے مگر انہیں لگتا ہے کہ ان پر سب سے زیادہ فخر ان کے سابق شوہر کو ہے، سابق شوہر جانتے ہیں کہ میں نے کتنی محنت کی اور کس طرح اداکاری میں مقام بنایا، اس لیے انہیں مجھ پر زیادہ فخر ہے۔