اداکارہ امر خان والدہ کی معترف کیوں ہیں؟

معروف اداکارہ امر خان نے انکشاف کیا ہے کہ ان کی والدہ سی لسٹر اداکارہ تھیں، اور ان پڑھ تھیں، اسی لیے انھوں نے میری تعلیم کے لیے ایڑھیاں تک رگڑی اور اپنے مقصد میں کامیاب ہوئیں، انہیں کی وجہ سے میں آج اے لسٹر اداکارہ ہوں۔امر خان حال ہی میں اپنی والدہ اداکارہ فریحہ جبین کے ہمراہ ’’دی ناک ناک شو‘‘ میں شریک ہوئیں، جہاں دونوں نے شوبز پر کھل کر بات کی، امر خان کی والدہ نے پروگرام میں بات کرتے ہوئے کہا کہ وہ ان پڑھ ہیں اور یہ بھی حقیقت ہے کہ وہ ’’سی‘‘ لسٹر اداکارہ تھیں لیکن ان کی خواہش تھی کہ اگر ان کی بیٹی شوبز میں آئے تو وہ ’’اے‘‘ لسٹر اداکارہ بنیں۔فریحہ جبین کے مطابق انہوں نے پاکستان ٹیلی وژن (پی ٹی وی) کے ڈراموں میں چند سیکنڈز کے کردار ادا کرنے سے اداکاری کا آغاز کیا اور آج تک وہ معاون اداکارہ ہی ہیں، وہ خود کو سی لسٹر اداکارہ مانتی ہیں، وہ صرف کام پر توجہ دیتی ہیں، انہیں فرق نہیں پڑتا کہ انہیں کتنی دیر کا کون سا کردار دیا جاتا ہے، بس وہ چاہتی ہیں کہ انہیں اچھا معاوضہ ملے۔فریحہ جبین نے کہا کہ انہوں نے بیٹی کے لیے بہت قربانیاں دیں،ان کی خواہش تھی کہ بیٹی لکھ پڑھ لے اور خدا نے ان کی مدد کی اور ان کی بیٹی پر کی گئی سرمایہ کاری کام میں آگئی، امر خان نے والدہ کی تعریفیں کیں اور اعتراف کیا کہ ان کی والدہ نے انہیں اچھا انسان بنانے کے لیے بہت قربانیاں دیں، ان کی والدہ ان پڑھ تھیں، اس لیے ان کی والدہ نے ایڑیوں کا زور لگا کر انہیں تعلیم دلوائی اور ان کی ماں چاہتی تھیں کہ ان کی بیٹی فرفر انگریزی میں بات کریں۔اداکارہ کے مطابق انہوں نے فلم میکنگ کی تعلیم حاصل کرنے کے بعد والدہ سے براہ راست اداکاری کی اجازت نہیں مانگی بلکہ فلمیں بنانے کی اجازت مانگی لیکن انہیں اداکاری کا شوق تھا، اس لیے انہیں علم تھا کہ فلم میکنگ کے بہانے وہ اداکاری کی فیلڈ میں بھی آ جائیں گی۔امر خان نے ایک سوال کے جواب میں بتایا کہ بالی وڈ اداکار رنبیر کپور انہیں بہت پسند ہیں اور ان کی خواہش ہے کہ وہ ان کے ہمراہ بھی کام کریں، انہوں نے فواد خان کو بہترین اور پسندیدہ اداکار قرار دیا اور کہا کہ وہ ان کے ہمراہ بھی کام کرنا چاہتی ہیں، انہوں نے بتایا کہ جلد ہی سکرین پر وہ ایک عام خاتون رپورٹر سے چینل کی مالک بن جانے کا کردار ادا کرتی دکھائی دیں گی۔