فواد خان، صنم سعید کی فلم ’’برزخ‘‘ فرانس فلم فیسٹیول کیلئے منتخب

معروف پاکستانی اداکار فواد خان اور اداکارہ صنم سعید کی نئی فلم ’’برزخ‘‘ نے عالمی سطح پر اہم اعزاز اپنے نام کر لیا ہے، دونوں سٹارز کی فلم کو فرانس فلم فیسٹیول کے لیے منتخب کر لیا گیا ہے، فلم کو وقاص حسن اور شیلجا کیجریوال نے پروڈیوس کیا ہے۔فرانس میں ہونے والے فلم فیسٹیول میں بھارتی اسٹریمنگ پلیٹ فارم زندگی اوریجنل کی سیریز ’برزخ‘ وہ واحد ویب سیریز ہے جسے ساؤتھ ایشیا سے منتخب کیا گیا تاہم سیریز کی ریلیز کی تاریخ تا حال سامنے نہیں آئی ہے۔

فلمساز عاصم عباسی کی اگلی فلم ’برزخ‘ سے ناظرین کو بہت سی توقعات وابستہ ہیں، ناظرین کے لیے اس فلم کی خاص بات یہ ہے کہ اس میں ماضی کے مقبول ڈراما ’زندگی گلزار ہے‘ کے سُپر ہٹ جوڑے فواد خان اور صنم سعید مرکزی کردار ادا کر رہے ہیں۔میڈیا رپورٹس کے مطابق فواد خان اس سیریز میں تنہا والد کے روپ میں نظر آئیں گے جبکہ صنم سعید ایک پوشیدہ اور پراسرار لیکن ہمدر دکردار ادا کرتے نظر آئیں گی، اس ویب سیریز کو بہترین سیریز، بہترین ہدایت کار، بہترین اداکارہ، بہترین اداکار کے ساتھ سٹوڈنٹ جیوری ایوارڈ کے لیے بھی نامزد کیا گیا ہے۔

’’پٹھان‘‘ریکارڈ کمائی کرنے والی پانچویں عالمی فلم بن گئی

ہدایت کار عاصم عباسی نے ایک بیان میں کہا کہ برزخ ایک فیملی ڈراما ہے، جس کی کہانی سپر نیچرل کرداروں کے گرد گھومتی ہے، فلم کی کہانی کی ابتدا ذاتی نقصان اور اس کے ساتھ آنے والے خوف سے ہوتی ہے، سیریز مینیا میں ’’برزخ‘‘ کا انتخاب ہم سب کے لیے ایک بہت اہم ہے، اس لیے نہیں کہ یہ میرے دل کے بہت قریب ہے بلکہ یہ کہانی ہمارے مضبوط یقین کی عکاسی کرتی ہے۔ورائٹی کو انٹرویو دیتے ہوئے عاصم عباسی نے کہا کہ سیریز کی عکس بندی پاکستان کے مقبول سیاحتی مقام ہنزہ اور اور کراچی شہر میں کی گئی، ’’برزخ‘‘ ان کی ذات سے بے حد قریب ہے، ان کے بقول ’اپنے والد کے انتقال کے بعد میں نے اپنے بیٹے کو پروان چڑھتے دیکھا جس کے بعد میرے ذہن میں پرانی یادیں آئیں کہ گزرتے وقت کے ساتھ یادیں اور محبتیں کہیں کھو گئیں۔شیلجاکیجروال کے مطابق ’’برزخ‘‘ کی کہانی کرونا کے وقتوں کا نتیجہ ہے جب وہ اور عاصم زندگی، محبت، موت اور اپنوں کو کھو دینے سے متعلق بات کیا کرتے تھے۔

واضح رہے کہ فواد خان اور صنم سعید کی ماضی کے مقبول ڈرامے ’زندگی گلزار ہے‘ میں جوڑی کو کافی سراہا گیا تھا اور ڈرامے کو بھارت میں بھی خوب پسند کیا گیا تھا، فواد خان بھارت میں ’اے دل ہے مشکل اور کپور اینڈ سنز‘ جیسی فلموں میں کام کر چکے ہیں اور وہاں ان کے لاکھوں مداح ہیں، جبکہ صنم سعید بھی ویب سیریز ’قاتل حسیناؤں کے نام‘ میں کام کر چکی ہیں۔