مہندرا سنگھ دھونی کرکٹ کے بعد اداکاری کے میدان میں

اپنی شاندار وکٹ کیپنگ سے دنیائے کر کٹ میں پہچان بنانے والے سابق بھارتی کپتان مہندرا سنگھ دھونی اب اداکاری کے میدان میں اپنے فن کے جوہر دکھانے کا فیصلہ کیا ہے۔ مہندر دھونی نے ایک فلم میں اپنے سائنس فکشن کردار کی جھلک جاری کر دی ہے جس کو مداحوں کی جانب سے خوب پسند کیا جا رہا ہے۔

مہندر سنگھ دھونی نے فیس بک پر اپنے کردار پر مبنی اینیمیٹڈ اور گرافکس ناول ’اتھاروا‘ کی جھلک کی مختصر ویڈیو شیئر کی ہے، جس پر ان کے مداح بے حد خوش دکھائی دیئے۔ “اتھاروا” نامی سائنس فکشن ناول کی کہانی رمیش تھملمانی نے لکھی جبکہ اس پر بنائی گئی ویڈیو اینیمیٹڈ گرافیکل سیریز کو اشوک منور اور ونسینٹ ادیکلراج پروڈیوس کریں گے۔

مہندر سنگھ دھونی نے ناول کی ویڈیو گرافیکل ویڈیو کو شیئر کرتے ہوئے مداحوں کو بتایا کہ جلد ہی ان کے کردار پر تیار کی گئی سائنس فکشن ناول کو پیش کردیا جائے گا۔ ناول کو جہاں کتابی شکل میں گرافکس اور اینیمیشن میں پیش کیا جائے گا، وہیں اس پر گرافیکل ویڈیوز بھی ریلیز کیے جانے کا امکان ہے۔

بھارتی صارفین نے پاکستانی ڈرامے کا کیپٹن اصلی سمجھ لیا

’اتھاروا‘ نامی ناول کی جاری کردہ ویڈیو اور مہندر سنگھ دھونی کے کردار کی جھلک سے عندیہ ملتا ہے کہ ممکنہ طور پر ناول کی کہانی ہندو مت کے قدیم مذہبی کرداروں پر مبنی ہوگی، تاہم اس حوالے سے کچھ بھی کہنا قبل از وقت ہے۔ اس ناول کے کردار کے علاوہ جلد ہی مہندر سنگھ دھونی اپنی اہلیہ کے تعاون سے تیار ہونے والی جاسوسی اینیمیٹڈ ویب سیریز’کیپٹن 7‘ میں بھی دکھائی دیں گے، جس سے متعلق وہ گزشتہ برس اعلان کر چکے ہیں۔

’کیپٹن 7‘ کو مہندر سنگھ دھونی کی ’دھونی پروڈکشن‘ اور ’بلیک وائٹ اورینج برانڈز ’’بی ڈبلیو او‘‘ مشترکہ طور پر بنائیں گے، جس کا پہلا سیزن 2022 میں ریلیز کیے جانے کا امکان ہے، یہ واضح نہیں ہے کہ ’کیپٹن 7‘ حقیقی زندگی سے ماخوذ ہوگی یا اس کی کہانی فکشن پر مبنی ہوگی اور یہ سیریز کس طرح کی جاسوس سیریز ہوگی؟
’کیپٹن 7‘ کے پہلے سیزن کی کاسٹ، کہانی اور پروڈکشن کے حوالے سے کام جاری ہے اور جلد ہی اس کی مزید کاسٹ کا اعلان بھی کیا جائے گا۔